Се нормализира состојбата на аеродромот во Минхен

Состојбата на аеродромот во Минхен се нормализира откако ноќеска повторно имаше откажувања и пренасочувања на летовите поради нови сомнителни напади со дронови.

Операциите постепено се обновуваат денеска, соопшти аеродромот на својата веб-страница, но ги предупреди патниците да се подготват за дополнителни доцнења во текот на денот.

Аеродромот беше принуден да ги суспендира летачките активности по втор пат оваа недела по најновите извештаи за забележани дронови, според ажурирањето на неговата веб-страница. Персоналот постави кревети и обезбеди освежување за да ги згрижи околу 6.500 патници погодени од прекинот.

Летови од лондонски Хитроу, Ланзароте и Лисабон беа пренасочени назад или кон други аеродроми, според податоци од тракерот FlightRadar24. AirNav Radar, друг тракер за летови, издаде известување до пилотите дека воздушниот простор е затворен поради забележани на дронови.

Претходниот ден, операциите во Минхен се нормализираа во 5 часот наутро по локално време, откако беа приземјени 17 авиони кои поаѓале и пренасочени 15 пристигнувања кон Штутгарт, Нирнберг, Виена и Франкфурт.

Нарушувањето во Минхен следи по неодамнешни инциденти со дронови низ Европа, кои предизвикаа привремени затворања и пренасочувања на големи аеродроми, вклучувајќи ги Копенхаген и Осло, и ги поттикнаа властите да предупредат на софистицирани оператори и пошироки безбедносни импликации. Бран од воздушни упади предизвика разговори во Европската Унија за изградба на „ѕид од дронови“.

Овој викенд ги означува последните денови од годинашниот „Октоберфест“, најголемиот народен фестивал во Минхен, кој секоја година привлекува милиони посетители.

Текстот е ажуриран со последното соопштение од аеродромот во Минхен.