„Ербас“ забранува полетување за некои свои авиони во услови на замрзнување

„Ербас СЕ“ (Airbus SE) ги ограничува операциите во особено студени временски услови за некои од своите авиони со тесен труп што имаат мотори на „Прат и Витни“ (Pratt & Whitney).

Европскиот производител на авиони ги информира авиокомпаниите за измените на постојните процедури за работа на моторите на земја во услови на замрзнување, според портпаролката на „Ербас“. Како резултат на тоа, постојат ограничувања за полетувања со моторите на „Прат и Витни“ во лоши временски услови со мраз, магла и видливост помала од 150 метри (490 стапки).

 

„Ербас“ соопшти дека е во тесна соработка со авиокомпаниите што се негови клиенти и дека „Прат и Витни“ веќе работи на решение. Од компанијата „Прат и Витни“ не одговорија веднаш на барањето за коментар.

За ова претходно извести списанието специјализирано за воздухопловна индустрија „Аеротелеграф“ (Aerotelegraph).

Ограничувањата се однесуваат на авионите „А320“ со еден коридор што користат мотори PW1100 GTF, а авиокомпаниите како „Ер Астана“ (Air Astane), националниот превозник на Казахстан, мораа да одложат неколку лета управувани од тие авиони поради ледена магла, објави денеска „Аеротелеграф“.

Формирањето мраз во лет може да биде опасно и е причина за неколку воздухопловни несреќи. Замрзнувањето може да го наруши протокот на воздух над крилата и да создаде отпор или да влијае на количеството на потисок што може да го генерира моторот.