Германија ќе одобри воени нарачки вредни над 50 милијарди евра

Германските пратеници денеска ќе одржат состанок зад затворени врати за да одобрат рекорден број договори за оружје, со што ќе започнат со одбранбени инвестиции од над 50 милијарди евра.

Триесетте нарачки ќе опфатат широк спектар на материјали и услуги, вклучувајќи 21 милијарда евра за основна воена опрема и облека, повеќе од четири милијарди евра за борбени возила „пума“ (Puma), 3,4 милијарди евра за самоодни хаубици и три милијарди евра за пресретнувачки ракети за воздушна одбрана „ароу 3“ (Arrow 3), според документите за набавки. „Блумберг њуз“ месецов веќе објави дека се очекува одобрувањето на ваквите набавки.

 

Другите договори што треба да се одобрат денеска, според документите, вклучуваат 3,7 милијарди евра за до 4.000 оклопни возила „игл“ (Eagle V) од „Џенерал дајнамикс јуропиан ленд системс“ (General Dynamics European Land Systems), 1,8 милијарда евра за извиднички сателити „спок“ (SPOCK 1) од „Рајнметал“ (Rheinmetall AG) и „Ајсеје“ (Iceye), 1,55 милијарда евра за пресретнувачки ракети „патриот“ (Patriot PAC-3 MSE) од „Локид Мартин“ (Lockheed Martin Corp.) и 1,23 милијарда евра за пресретнувачки ракети земја-воздух „ирис“ (IRIS-T SLM) од „Дил дифенс“ (Diehl Defence GmbH).

Тоа означува и најголем број на големи воени нарачки, но и највисок вкупен износ на трошоци за одбрана досега одобрени на една седница од буџетската комисија во Долниот дом на Бундестагот. Следната година ќе се одобрат уште договори.

Напорите се дел од пошироката амбиција на канцеларот Фридрих Мерц да го трансформира Бундесверот во најсилната конвенционална армија во Европа со оглед на растечките закани од Русија, додека истовремено САД ја доведуваат во прашање посветеноста на НАТО на континентот.

Социјалдемократскиот канцелар Олаф Шолц, кој ја започна воената експанзија, ја нарече историска пресвртница или „Цајтенвенде“ (Zeitenwende). Мерц го забрза градењето, укинувајќи ги ограничувањата за задолжување за одбрана за да има повеќе средства за вооружување.

Сумата од над 50 милијарди евра претставува приближно една десеттина од федералниот буџет на Германија во 2025 година и делумно ќе биде финансирана од посебен фонд за модернизација на војската, кој го создаде Шолц брзо по целосната инвазија на Русија врз Украина во 2022 година.

Владејачката коалиција во Германија, составена од конзервативците на Мерц и социјалдемократите од левиот центар, има цел да ја исполни новата обврска од НАТО за обезбедување 3,5 проценти од бруто-домашниот производ до 2029 година за основни трошоци за одбрана, што би било многу пред зададениот краен рок - 2035 година.