Шведски хит во одбранбената индустрија - акцијата скокна над 80 отсто

Мала шведска компанија за одбранбена технологија стана најуспешната европска акција од одбранбениот сектор во 2026 година, поттикната од растечките воени буџети во Европа и промената на приоритетите кон беспилотни летала, компјутерски системи и дигитална опрема.

Акциите на „Милдеф груп“ (Mildef Group AB), компанија со седиште во Хелсингборг која произведува издржливи лаптопи, сервери и компјутерски екрани за оклопни возила, годинава пораснаа за повеќе од 80 отсто. Додека растот на акциите на поголеми одбранбени компании како „Рајнметал“ (Rheinmetall) и „Сааб“ (Saab) забави, „Милдеф“ продолжи да напредува со забрзано темпо.

Извршниот директор на компанијата, Даниел Љунгрен, растот го поврзува со она што го нарекува „трета бран“ на европското воено трошење, во кое фокусот постепено се префрла од традиционалното оружје кон технологии што ги поврзуваат воените системи и овозможуваат нивно поефикасно управување.

Според него, првиот бран уследи по руската инвазија на Украина во 2022 година, кога приоритет беа основните оперативни потреби - муниција, опрема за војниците и гориво за тенковите. Потоа следуваше втор бран, во кој големите одбранбени компании добија низа значајни договори.

„Сега сме во третиот бран, на следното ниво во овој екосистем“, изјави Љунгрен.

„Милдеф“ во последните месеци обезбеди неколку големи договори. Во јули компанијата објави две седумгодишни рамковни спогодби - едната за испорака на системи за командување и контрола за шведските вооружени сили, во вредност до 1,5 милијарди шведски круни, односно околу 160 милиони долари, а другата со германските вооружени сили, со максимална вредност од 527 милиони евра, или околу 610 милиони долари.

„Милдеф“ зема залет додека „Рајнметал“ бележи пад

 

Bloomberg

Растот на воените издвојувања во Европа не се одразува само врз традиционалните производители на оружје. Со зголемувањето на интересот за беспилотни летала и технологијата што ги управува, во фокусот се најдоа и компании од одбранбениот технолошки сектор.

Акциите на „Конгсберг“ (Kongsberg Gruppen) и „Кохорт“ (Cohort), кои минатата година заостануваа зад конкурентите, годинава повторно растат. Меѓу најголемите добитници е и аеро-космичкиот добавувач „Сениор“ (Senior), кој воедно е потенцијална цел за преземање.

Француската ЕТ (Exail Technologies), која произведува подводни беспилотни системи, забележа раст на акциите од околу 50 отсто. Побарувачката за нејзините производи се зголеми поради растечката загриженост од заканата од морски мини во Ормускиот Теснец. На почетокот на јули „Талес“ (Thales) потпиша обврзувачки договор за нејзино преземање.

Меѓу компаниите што го надминаа поширокиот одбранбен сектор е и производителот на подморници ТКМС (TKMS), по добивањето големи нарачки од Германија и Канада.

Сепак, силниот раст на одбранбените акции не значи дека секторот е без ризици. Геополитичката неизвесност и високите вреднувања на компаниите ја зголемуваат нестабилноста на пазарот. „Милдеф“, откако на почетокот на неделата бележеше раст од над 80 отсто од почетокот на годината, до петокот загуби околу 9 отсто, во рамките на поширокото повлекување на одбранбените акции. И покрај тоа, компанијата остана најголем добитник во секторот.

Аналитичарите сега се обидуваат да проценат колку долго може да продолжи растот на одбранбените акции и кои компании ќе бидат најголемите победници во следната фаза.

Аналитичарите на „Барклис“ (Barclays), предводени од Афонсо Осорио, во анализа од 11 август изразија оптимизам за дел од големите компании, но истовремено препорачаа инвеститорите да бидат поселек­тивни при изборот на акции.

Осорио очекува на пазарот да има „поголемо разграничување“ меѓу компаниите, бидејќи за инвеститорите сè поважни ќе станат видливоста на идните приходи, квалитетот на производственото портфолио и способноста на компаниите успешно да ги реализираат договорите.

„Милдеф“ во меѓувреме се фокусира на зголемување на производството за да одговори на растечката побарувачка и да го зголеми својот удел на пазарот. Тоа е сектор во кој долгогодишните односи со локалните партнери често имаат значајна улога при добивањето нови договори.

Според Љунгрен, преземањата и партнерствата се важен дел од стратегијата на компанијата, која постојано ги следи можностите за проширување на други пазари.

„Тој радар е постојано вклучен“, вели Љунгрен.