Инвеститорите профитираат од отпорноста на Европа

Европските пазари силно напредуваат оваа година, спротивно на мрачните прогнози дека војната во Иран ќе го втурне регионот во стагфлација.

Индексот Stoxx Europe 600 порасна за околу 12 отсто во 2026 година, додека берзанските индекси во Германија, Италија и Франција достигнаа рекордни нивоа. Германските државни обврзници остваруваат подобри резултати од американските државни обврзници, додека еврото е блиску до највисокото ниво во последните два месеца.

Инвеститорите се насочуваат кон европските акции и обврзници, привлечени од најдобрата сезона на корпоративни резултати во речиси четири години и економскиот замав, кој забрзува, но и натаму е доволно умерен за да не ги загрижува креаторите на монетарната политика во Европската централна банка (ЕЦБ). Особено некои обврзнички фондови велат дека Европа изгледа попривлечно од САД поради недостигот од јасност околу политиката на Федералните резерви.

„Економијата е во поволна позиција, во која нема потреба ЕЦБ да ги зголемува каматните стапки бидејќи инфлацијата не е надвор од контрола, а истовремено растот е доволно силен за да ги поддржи акциите“, изјави Софи Хуин, портфолио-менаџер во „БНП Париба асет менаџмент“ (BNP Paribas Asset Management). „Додадовме опции за купување европски акции бидејќи постои простор за нивен натамошен раст.“

 

 

Компаниите во индексот MSCI Europe пријавија раст на добивката од 17 отсто во вториот квартал, што е најголемото зголемување од крајот на 2022 година, според податоците собрани од „Блумберг интелиџенс“. Секторите што се почувствителни на економскиот раст, како рударството и индустриските производи, се меѓу оние што најмногу придонесуваат за растот.

„Луѓето навистина ги привлекува отпорноста на корпоративните добивки“, изјави Хелен Џуел, меѓународен главен инвестициски директор за фундаментални акции во „Блекрок“ (BlackRock Inc.). Пошироката изложеност на Европа на вештачката интелигенција исто така помага, овозможувајќи им на инвеститорите „да инвестираат во трендот на ВИ на помалку ризичен начин отколку кај поконцентрираната изложеност што може да се види во делови од Азија и САД“.

Откако пазарот првично главно ги наградуваше американските компании што трошат стотици милијарди долари за да го овозможат развојот на ВИ, учесниците на пазарот сега се насочуваат кон компании што ќе имаат корист од примената на технологијата. Кошницата на Банката на Америка (Bank of America Corp.) составена од европски компании што применуваат ВИ порасна за 14 отсто од почетокот на годината, во споредба со растот од четири отсто кај американските хиперскалери.

Од почетокот на годината европските акции привлекоа најсилен прилив на капитал во последната деценија, со исклучок на 2021 година, поттикнат речиси целосно од странски инвеститори, се наведува во белешка на „Голдман Сакс“ (Goldman Sachs Group Inc.).

Инвеститорите во обврзници исто така се насочуваат кон Европа, бидејќи подобрените изгледи за раст на регионот и натаму заостануваат зад другите големи економии. Реалниот бруто-домашен производ на еврозоната се предвидува да порасне за 0,8 отсто во 2026 година и 1,2 отсто во 2027 година, во споредба со прогнозираниот раст од 2,2 отсто и 2,1 отсто во САД, покажуваат податоците собрани од „Блумберг“.

ЕЦБ оваа година еднаш ги зголеми каматните стапки за четвртина процентен поен, а се очекува да ги зголеми уште двапати до средината на следната година за да го ограничи инфлацискиот шок предизвикан од војната. Но умерените изгледи за раст помагаат да се одржи побарувачката за долгот на еврозоната, особено во време кога фискалните и политичките ризици стануваат потешки за процена на пазари како САД и Јапонија.

„Европските државни обврзници остануваат привлечни за меѓународните инвеститори“, изјави Ерик Лим, стратег за каматни стапки во „Комерцбанк“ (Commerzbank AG). „ЕЦБ веќе реагираше на шокот од Иран и нејзината идна политика е полесна за предвидување за пазарите во споредба со Фед, каде што комуникацијата се движи во нова насока.“

 

Разликата меѓу приносите на 30-годишните американски и германски државни обврзници минатата недела достигна највисоко ниво во последната година, додека инвеститорите ги доведуваат во прашање кредибилитетот на Фед и долгорочната насока на фискалната политика. Европа не е имуна на фискалните притисоци, а изборите во Франција и во Италија следната година претставуваат потенцијален ризик, но засега тие се сметаат за помалку сериозни.

Промената на расположението се гледа и во прекуграничните текови на капитал. Јапонските инвеститори минатиот месец купуваа француски државни обврзници, додека продаваа американски и австралиски обврзници, покажуваат најновите податоци за платниот биланс на Јапонија.

Според „Морнингстар“ (Morningstar Inc.), во јули инвеститорите вложиле повеќе од 1,45 милијарда евра во ЕТФ-ови што инвестираат во европски државни обврзници, повеќе од двојно во однос на 655 милиони евра вложени во фондови со државни обврзници во долари.

Подобрена побарувачка за европски средства може да се забележи и кај еврото, кое во петокот достигна највисоко ниво во последните седум недели и моментално се тргува над 1,15 долари. Иако тоа делумно ја одразува општата слабост на доларот, МУФГ прогнозира дека заедничката валута ќе порасне на 1,20 долари до средината на следната година, бидејќи менаџерите на девизните резерви ги диверзифицираат своите валутни средства.

„Еврото е валута број еден во која треба да се зголеми изложеноста во следните 12 до 24 месеци“, изјави Дерек Халпени, раководител на истражувањата во „МУФГ банка“ (MUFG Bank Ltd.).

Еврото се тргува близу највисокото ниво во последните два месеца во однос на доларот

Општата слабост на доларот ја зголеми вредноста на заедничката валута над 1,15 долари

Извор: Bloomberg

Сепак, некои од учесниците на пазарот остануваат скептични околу тоа колку долго ќе трае обновениот оптимизам кон Европа.

Цените на нафтата се речиси 26 отсто над најниското ниво од јули, а договорот за целосно повторно отворање на Ормускиот Теснец и натаму е недостижен. Ниските европски резерви на течен природен гас и растот на глобалните цени на храната би можеле дополнително да ги засилат инфлациските притисоци подоцна оваа година.

Што велат стратезите на „Блумберг“...

Европската централна банка дејствуваше проактивно во ограничувањето на инфлацијата и, откако веќе ги зголеми каматните стапки како одговор на конфликтот на Блискиот Исток, сигнализираше дека е подготвена да преземе дополнителни мерки - што го поддржува еврото.

- Вен Рам, стратег за повеќе класи на средства 

Иако пазарот на обврзници веројатно веќе целосно ги има вградено во цените очекуваните зголемувања на каматните стапки од ЕЦБ, влошувањето на јавните финансии и политичката неизвесност ќе го нарушат расположението, според Џејмс Ати, инвестициски менаџер во „Марлборо инвестмент менаџмент“ (Marlborough Investment Management). Тој исто така им дава предност на јапонските акции пред европските за изложеност на економскиот циклус.

За Данкан Томс, стратег за повеќе класи на средства во ХСБЦ (HSBC Holdings Plc), привлечноста на Европа зависи од тоа колку брзо инвеститорите повторно ќе се насочат кон акциите што го предводеа тргувањето поврзано со ВИ, вклучувајќи ги и производителите на полупроводници.

„Бидејќи сметаме дека повлекувањето на замавот во голема мера заврши, од релативна перспектива, повторното засилување на акциите на производителите на полупроводници го отежнува одржувањето на подобрите резултати на европските пазари“, изјави Томс.

-Со помош на Џорџија Хол и Алис Гледхил