Епстајн со години се обидувал да се сретне со Путин

Џефри Епстајн беше во мисија да се сретне со Владимир Путин кога во неговиот имејл пристигна еден интригантен предлог.

Рускиот претседател беше подготвен да го прими Епстајн, според порака од октомври 2014 година од кореспондент во база на податоци со повеќе од 3,5 милиони документи што му припаѓаат на покојниот осуден сексуален престапник и кои предизвикаа потреси во глобалната политика и бизнис.

„Разговарав со Путин,“ напишал посредникот, чиј идентитет е редактиран од американското Министерство за правда. „Тој би бил многу задоволен ако го посетиш и му објасниш за финансиските пазари во 21 век. Дигитална валута, деривативи, структурирани финансии. Би го организирал состанокот кога следно ќе бидеш во Европа. Сигурен сум дека ќе си се допаднете еден на друг.“

Неколку часа подоцна, Епстајн ја препратил пораката со барање за совет до Кети Румлер, која се повлекува од функцијата генерален советник на „Голдман“ откако деталите за нејзината поврзаност со дискредитираниот финансиер излегоа на виделина во документите објавени од Министерството за правда.

Во својот одговор, Епстајн претпоставил дека нејзиниот совет ќе биде да не оди „за сега“ - и навистина така било. Румлер одговорила кратко: „Да, мојот одговор е сè уште ист,“ напишала таа. „Твојата забава е одбиена.“

Претпазливоста во тој момент била разбирлива. Неколку месеци претходно, Путин испратил руски трупи да го анектираат Крим од Украина, што предизвика широки санкции од САД и Европската Унија и ја поттикна геополитичката криза која подоцна прерасна во најголемиот конфликт во Европа по Втората светска војна.

Фасцинацијата на Епстајн со Путин и Русија не стивнала, иако документите го прикажуваат како човек кој во голема мера бил збунет околу тоа кој навистина има моќ и влијание кај рускиот лидер. Фајловите покажуваат повеќегодишен обид да обезбеди средба лице-в-лице со Путин, чие име се појавува околу 1.000 пати во базата на податоци.

На крајот, изгледа дека неговата потрага била неуспешна. Портпаролот на Кремљ, Дмитриј Песков, изјави дека Путин никогаш не се сретнал со Епстајн, колку што му е познато, и досега не се појавиле докази дека тоа се случило.

Почетокот на истата година, во јануари, Епстајн му предложил на поранешниот норвешки премиер Торбјорн Јагланд да биде политичарот кој би можел да се сретне со Путин во Сочи. Рускиот црноморски ресорт наскоро требаше да биде домаќин на Зимските олимписки игри во 2014 година - најскапите во историјата, бидејќи Путин потрошил 50 милијарди долари за да ги претстави игрите како симбол на постсоветската обнова на земјата.

Спортот не му бил приоритет на Епстајн. „Можеш да му објасниш на Путин дека треба да постои софистицирана руска верзија на биткоин,“ напишал тој. „Тоа би бил најнапредниот финансиски инструмент достапен на глобално ниво.“

Јагланд беше меѓу најистакнатите европски политичари во тоа време, како генерален секретар на Советот на Европа во текот на една деценија, од октомври 2009 до септември 2019 година. Според веб-страницата на Кремљ, Јагланд се сретнал со Путин на 20 мај 2013 година, а во 2014 повторно се вратил во Сочи за отворањето на Олимписките игри.

На 8 мај 2013 година, Епстајн го замолил Јагланд да му обезбеди средба со рускиот лидер. „Знам дека ќе се сретнеш со Путин на 20-ти. Тој очајно сака да привлече западни инвестиции во неговата земја,“ напишал финансиерот. „Јас ја имам неговата солуција. Тој треба да ги осигури руските инвестиции, што значи дека владата го презема првиот загубен ризик.“

Епстајн продолжил: „Признавам дека прашањата за човекови права се во преден план на твоето патување, но ако ти е од помош, би сакал да се сретнам со него некаде во јуни и да ја објаснам солуцијата за неговиот врвен приоритет. Мислам дека тоа би било добро за твоите цели. Размени нешто што тој навистина сака, за нешто што ти сакаш.“

Неколку дена подоцна, Јагланд му одговорил на Епстајн: „Сето ова не е лесно за мене да му го објаснам на Путин. Ти мораш да го направиш тоа. Мојата работа е да обезбедам средба со него.“

Епстајн одговорил дека Путин „е во уникатна позиција да направи нешто големо, како што ‘Спутник’ направи за вселенската трка.“ Додал: „Би сакал да се сретнам со него, но минимум два до три часа, не пократко.“

Очигледно, од Москва дошла противпонуда која не го воодушевила Епстајн. На 21 мај тој му напишал на поранешниот израелски премиер Ехуд Барак дека Путин предложил средба за време на Меѓународниот економски форум во Санкт Петербург следниот месец.
„Му реков не,“ напишал Епстајн до Барак. „Ако сака да се сретне, ќе мора да одвои вистинско време и приватност. Да видиме што ќе се случи.“

Неколку дена претходно, на 9 мај, Епстајн му признал на израелскиот политичар дека „никогаш не сум го сретнал.“

Две години подоцна, во 2015, Барак му напишал благодарница на Епстајн за тоа што му овозможил учество на форумот во Санкт Петербург, каде што имал средби со гувернерката на Банката на Русија, Елвира Набиулина и министерот за надворешни работи Сергеј Лавров, како и со директорите на двете најголеми банки во земјата - Херман Греф од „Сбербанк“ и Андреј Костин од ВТБ.

Портпаролот на Барак не понудил коментар.

Уште во ноември 2010 година, Епстајн се фалел на еден кореспондент дека има „пријател на Путин“ кој може да му помогне да обезбеди руска виза, како одговор на покана за забава.

Во апликација за едногодишна руска виза во 2011 година, Епстајн навел дека добивал визи секоја година освен една, во периодот од 2002 до 2007, и патувал во земјата. Не е јасно колку пати ги користел визите, но документите покажуваат дека повеќепати планирал да оди таму.

Во април 2018 година добил имејл дека неговата руска виза истекува и дека ќе му треба официјална покана за да ја „обнови за тригодишна бизнис виза.“ Визата била издадена во јуни.

Епстајн испратил уште електронски пораки до Јагланд за средби со Путин до јуни 2018. Последната порака, околу еден месец пред Путин да го одржи првиот самит со американскиот претседател Доналд Трамп во Хелсинки, била најкратка:
„Би сакал да се сретнам со Путин,“ напишал Епстајн.

Норвешките власти започнаа истрага за корупција против Јагланд овој месец поради неговите врски со Епстајн.

Јагланд „целосно соработува со полицијата и дал детална изјава за сите релевантни прашања,“ изјавил неговиот адвокат Андерс Бросвет, одбивајќи да коментира понатаму. „Тој ги негира сите обвиненија против него.“

Bloomberg

Изборот на Трамп во 2016 му дал на Епштајн повеќе можности да гради контакти со Русија, претставувајќи се како човек кој може да го објасни новиот политички лидер. Тоа Епстајн го правел за време на првиот мандат на Трамп, советувајќи странски официјални лица како најдобро да се справат со новиот претседател, според едно лице кое го познавало во тоа време.

Еден од нив, очигледно, бил Виталиј Чуркин, рускиот амбасадор во Обединетите нации во Њујорк до неговата смрт во февруари 2017. Епштајн му тврдел на Јагланд дека го советувал Чуркин како да разговара со Трамп, и предложил да му каже на Путин дека Лавров исто така може да „добие увид преку разговор со мене.“

Во јуни 2018, Епштајн напишал: „Чуркин беше одличен. Го разбра Трамп по нашите разговори. Не е комплексно. Тој мора да се види дека добива нешто - толку е едноставно.“

Според документите на Министерството за правда, Епстајн имал редовен контакт и со Сергеј Белјаков, поранешен заменик министер за економија и дипломец на руската ФСБ, кој бил вклучен во организирањето на економскиот форум во Санкт Петербург. Во еден имејл  од 2015 година, Епстајн го опишал како „многу добар човек.“

Белјаков не одговорил на барањето за коментар.

Епстајн се фалел со своите врски во ФСБ во друга порака од 2015 до непознат контакт кого го обвинил за обид за уцена.

„Сметав дека е неопходно да контактирам некои пријатели во ФСБ, иако не ти го дадов името,“ напишал Епстајн. „Затоа очекувам никогаш повеќе да не слушнам закана од тебе.“