Рецептот на канцеларот Шолц против нападите од Маск: „Останете кул“

Германскиот канцелар Олаф Шолц рече дека неодамнешните напади на Илон Маск врз него и некои други водечки политичари во земјата немаат влијаат врз него или врз демократијата на нацијата.

„Како социјалдемократи, од минатиот век сме навикнати на фактот дека има богати медиумски претприемачи кои не ја ценат социјалдемократската политика и не ги задржуваат своите мислења за себе. Не е ништо ново кога станува збор за тоа. Мора да останете ладни“, изјави Шолц за списанието „Штерн“ (Stern).

Најбогатиот човек на светот во последниве недели на својата социјална мрежа Х повеќепати ја пофали антиимигрантската партија Алтернатива за Германија, позната по нејзиниот германски акроним АфД, а минатиот викенд истото го стори и преку весникот „Велт ам зонтаг“ (Welt am Sonntag). Маск, коосновач и главен извршен директор на „Тесла“ (Tesla Inc.), кој е клучен советник и главен донатор на новоизбраниот американски претседател Доналд Трамп, претходно го нарече Шолц „будала“. За неговите обиди да влијае на германскиот електорат и како тоа може да се одрази „Блумберг Адрија“ веќе пишуваше во подлабинска анализа.

Испадите на Маск доаѓаат на само два месеца пред Германците да излезат на гласање на предвремените избори во февруари, на кои Шолц ќе им се спротивстави на кандидатот на Христијанско-демократската унија (ЦДУ), Фридрих Мерц, и на кандидатката на АфД, Алис Вајдел.

„Не ми се верува дека ‘мешањето ‘ на Илон Маск на изборите во Германија може да донесе драстична промена на гласачкото расположение“, смета Благојче Атанасоски, магистер по политички науки. Следејќи ги состојбите на политичката сцена во Европа, тој вели дека германското гласачко тело се води по традиција и не верува во надворешни влијанија.

Но, Маск не застанува тука. Тој почна да го критикува и германскиот федерален претседател Франк Валтер Штајнмајер, нарекувајќи го „недемократски тиранин“. Тоа предизвика вознемиреност меѓу Германците.
„Сојузниот претседател не е антидемократски тиранин, а Германија е силна и стабилна демократија. Маск може да каже што сака. Во Германија владее волјата на нејзините граѓани, а не непредвидливите изјави на милијардерите од САД“, рече Шолц.

На 9 јануари, Маск планира да разговара во живо со партискиот лидер на АфД, Алис Вајдел на платформата Х. Вајдел се натпреварува како прв кандидат за канцелар за нејзината десничарска партија, но не се очекува дека може да формира влада бидејќи сите други демократски партии ја отфрлија можноста за коалиција со АфД.

Во пишување на текстот учествуваше и Арне Делфс од „Блумберг“.

Во моментов нема коментари за веста. Биди прв да коментира...

Остави коментар