САД ќе воведат задолжителни проверки на социјалните мрежи за некои патници

САД предлагаат странските посетители да ја доставуваат својата историја од социјалните мрежи за последните пет години за да влезат во земјата, вклучувајќи ги и патниците од Австралија, Германија, Јапонија и Обединетото Кралство, кои досега можеа да влезат без виза.

Според соопштението на Министерството за домашна безбедност објавено во средата, Американската царинска и гранична служба „ја додава социјалната мрежа како задолжителен податок“ во рамките на процесот на проверка за патниците што влегуваат во САД преку Програмата за укинување визи. Предлогот е објавен со рок од 60 дена за јавни коментари.

Мерката би се однесувала на патниците од околу 40 земји што можат да престојуваат во САД до 90 дена без виза и кои се проверуваат пред патување преку електронскиот систем познат како ЕСТА.

Овој план е најнов во серијата мерки на администрацијата на Трамп насочени кон ограничување на влезот. Тоа веќе вклучува и најавена забрана за патување за околу 30 земји, објавена овој месец по убиството на двајца припадници на Националната гарда во Вашингтон.

Федералните власти го идентификуваа осомничениот како авганистански државјанин што работел со американските сили и со ЦИА во Авганистан пред да пристигне во САД во 2021 година. Претседателот Доналд Трамп и неговите сојузници го искористија случајот за да ја обвинат администрацијата на Бајден дека го пуштила да влезе во земјата и да побараат построги ограничувања за мигрантите.

Трамп во објава на социјалните мрежи по убиството наведе дека ќе преземе чекори за „постојано“ да ја прекине миграцијата од „сите земји од Третиот Свет“.

Американските власти исто така ќе спроведат „сеопфатна повторна проверка“ на одобренијата издадени за лица од тие земји што влегле по почетокот на мандатот на претседателот Џо Бајден во 2021 година, соопшти Американската служба за државјанство и имиграција.

Стејт департментот во декември соопшти дека ќе ги прошири обврските за проверка на социјалните мрежи за визите H-1B за висококвалификувани работници, повикувајќи ги апликантите и нивните придружни членови да ги постават сите свои профили на социјалните мрежи како јавни. Во јуни беше наложена и проверка на онлајн присуството на апликантите за студентски визи.

САД се на пат кон остар пад на бројот на странски посетители и трошоци од туристи годинава. Податоците од мај покажаа дека земјата ќе загуби околу 12,5 милијарди долари туристички приходи во 2025 година, при што потрошувачката на посетителите се очекува да падне под 169 милијарди долари до крајот на годинава.

Земјата исто така се соочува со својот прв пад на бројот на странски туристи во околу пет години, со предвидени 67,9 милиони посети годинава, наспроти 72,4 милиони во 2024 година, соопшти Американската туристичка асоцијација.

САД беа единствената од 184 анализирани светски економии во студијата на Светскиот совет за патувања и туризам и „Оксфорд економикс“ (Oxford Economics) во мај, за која беше проектирано дека ќе загуби туристички приходи годинава. 

Падот им беше припишан на останатите ковид-ограничувања за патување, силниот долар и променетите ставови за САД поради реториката и политиките „Америка пред сè“ на администрацијата на Трамп, се наведува во извештајот.