Бројот на странски студенти во САД опаѓа четврти месец по ред, најпогодена е Азија

Бројот на посетители што пристигнуваат во САД со студентски визи се намали во јули, што претставува четврти последователен месец како на годишно ниво опаѓа бројката на нови странски студенти.

Најизразено беше намалувањето од Азија, најголемиот меѓународен пазар за образование, бидејќи имиграциските политики на администрацијата на Доналд Трамп создадоа тесни грла и ефект на заплашување врз потенцијалните студенти.

Bloomberg Mercury

 

Вкупниот број на пристигнувања со студентски визи се намали за 28 проценти, на нешто помалку од 79.000, што е најголемиот месечен пад годинава, покажуваат податоците од Администрацијата за меѓународна трговија.

Пристигнувањата на студенти од Индија речиси се преполовија, поточно се намалија за 46 проценти, додека Кина забележа пад од 26 отсто. Драстичниот пад од двата најголеми извора на странски студенти дава мрачна слика, што се заканува да ги наруши финансиските модели на американските колеџи и универзитети.

Американските универзитети веќе предупредија дека се предвидува дека запишувањето странски студенти за првпат на кампусите есенва ќе се намали за околу 30 отсто, што потенцијално ќе го чини образовниот сектор 2,6 милијарди долари приходи од школарина. Остриот пад следува по низата промени во политиката и административните пречки што ги наметна Белата куќа заради заострување на контролата врз имиграцијата и странските студенти.

Мерките создадоа клима на неизвесност и резултираа со значителни застои и одложувања во амбасадите и конзулатите на САД на клучните азиски пазари.

„Постојат вистински причини за загриженост“, рече Зузана Чепла Вутсон, заменик-директорка за федерална политика во Претседателскиот сојуз за високо образование и имиграција, чии членови се универзитетски професори. „Тоа е дел од поширок модел под водство на оваа администрација. Забраната за патување, проширените процеси на проверка, застоите во закажувањето термини - сето тоа создава неизвесност за студентите од Кина, Индија и пошироко“.

Bloomberg Mercury

 

Администрацијата на Трамп кон крајот на мај објави пауза за интервјуата за студентски визи. Кон средината на јуни Стејт департментот соопшти дека ќе продолжи со интервјуата, но нареди и прегледи на профилите на апликантите на социјалните мрежи. Долгото време потребно за спроведување на овие политики, и тоа во врвот на летната сезона за аплицирање за визи, се покажа како особено штетно и не е добар знак за пристигнувањата на студентите во август, што историски гледано е месец кога во САД пристигнуваат најмногу нови странски студенти.

Бројките за пристигнување на студентите не покажуваат јасно дали тие што доаѓаат се нови или студенти што се враќаат. Многумина што веќе имаат студентски визи можеби избрале да останат во САД и да не патуваат летово поради надзорот на администрацијата врз меѓународните научници, рече Вутсон.

Надлежните од училиштата со голема азиска студентска популација, како што е Универзитетот во Јужна Калифорнија, изјавија дека континуираниот пад може да резултира со десетици милиони долари изгубени приходи. Тој универзитет веќе се соочува со дефицит од 200 милиони долари. Во меѓувреме претседателот на Државниот универзитет во Аризона, Мајкл Кроу, рече дека одложувањата на визите претставуваат поголем проблем дури и од пандемијата.

На американските високообразовни институции во учебната 2023/2024 година беа запишани рекордни 1,1 милион меѓународни студенти, според „Опен дорс“ (Open Doors), која собира податоци за странските научници. Во таа академска година Индија беше водечка земја, со речиси 332.000 студенти, по која следуваше Кина, со околу 277.000 студенти.

Во моментов нема коментари за веста. Биди прв да коментира...

Остави коментар