Конзервативната германска влада ја оцени како „неприфатлива“ можноста за непријателско преземање на „Комерцбанк“ (Commerzbank AG) од страна на „Уникредит“ (UniCredit SpA), откако италијанската банка поднесе понуда од 35 милијарди евра (40 милијарди долари) за франкфуртската банка.
Канцеларот Фридрих Мерц и неговата владејачка коалиција од блокот ЦДУ/ЦСУ (CDU/CSU) и Социјалдемократите продолжуваат да ја поддржуваат стратегијата на „Комерцбанк“ како независна банка, изјави во понеделникот Максимилијан Кал, портпарол на Министерството за финансии, на редовната владина прес-конференција во Берлин. Кал додаде дека на управата и надзорните одбори на „Комерцбанк“ им е оставено да разгледаат каква било потенцијална понуда.
Мерц и неговите партнери од СПД (SPD) доследно се спротивставуваат на намерите на „Уникредит“ кон втората по големина германска банка, критикувајќи го начинот на кој италијанската банка го изгради својот почетен удел. „Уникредит“ моментално поседува нешто помалку од 30 отсто од акциите на „Комерцбанк“, додека германската влада во Берлин има 12,5 отсто.
Понудата од понеделник би ѝ овозможила на „Уикредит“ да го зголеми својот удел над 30 отсто. Според германскиот закон, компанија која ја надминува границата од 30 отато е должна да понуди купување на акциите на сите акционери, но само еднаш.
Отстранувањето на ова ограничување ќе ѝ даде на италијанската банка поголема флексибилност во управувањето со својот удел. Уделот во „Комерцбанк“ веќе беше близу до границата од 30 отсто, а откупот на акции спроведен од германската банка ја принуди „Уникредит“ да продаде дел од акциите за да остане под таа граница, изјави извршниот директор Андреа Орсел на конференциски повик со аналитичарите.
Тоа го потенцира продолжениот интерес на Орсел за „Комерцбанк“. Тој ја претстави понудата како можност за подобрување на односите со различните засегнати страни на банката, истовремено ослободувајќи ја за купување акции на отворениот пазар, што потенцијално го олеснува патот кон преземање.
Фрауке Хајлигенштадт, членка на финансиската комисија на долниот дом на парламентот од СПД, претходно во петокот изјави дека партијата ја одбива понудата за преземање од „Уникредит“, заедно со „управата на 'Комерцбанк', синдикатот и федералната влада“.
Хајлигенштадт, која е и членка на раководството на СПД, ги повтори повиците од министерот за финансии Ларс Клингбајл до „Уникредит“ да се воздржи од обиди за преземање и рече дека „Комерцбанк“ покажала дека може успешно да работи самостојно.
На прашање за интеракциите со германските политичари, Орсел рече: „имавме некои разговори, не толку колку што сите би сакале.“
Понудата „ни обезбедува транспарентна платформа за проширување и продлабочување на тие разговори“, им рече тој на аналитичарите. „Апсолутно сме отворени да најдеме решенија за сите да бидат вклучени.“
.webp){kind=icon}
