.webp){kind=icon}
Од повоена Македонија, па до крајот на 20 век, таписеријата била мошне застапена текстилна уметност за создавање декоративни покривки за ѕидови и подови, за делови на мебел или како независно уметничко дело. Сега, таа конечно доби и една поинаква намена.
Станува збор за уникатни македонски чанти изработени со техника на таписерија, кои неодамна беа пласирани како нов тренд во домашната текстилна индустрија. Овие впечатливи рачно изработени модни додатоци се дел од колекцијата „Херитеџ“ (Heritage), која компанијата „Еснаф“ ја создаде за да го поттикне зачувувањето на културното наследство и да ги заживее традиционалните занаети.
Авторка на колекцијата е етаблираната македонска дизајнерка Росица Мршиќ. Таа за „Блумберг Адрија“ детално го опишува процесот на создавање на чантите.
Еснаф
„Основата на идејата за дизајнот и графиката на овој модел е игра со формата на триаголник, кој ги симболизира женската плодност, домот и семејството. Идејата е преточена во скица и план за изработка на таписеријата, а потоа, со изборот на материјалот и боите, го постигнавме посакуваниот визуелен ефект. Целосно рачно извезена со нишки од памучна и волнена волница, потребни се повеќе денови за да се изработи на платно. Завршно, готовиот преден дел се шие во форма на торба и се додаваат кожени рачки, кои се изработени од остатоци од локалната индустрија“, објаснува Мршиќ.
Биле направени многу проби пред да се изберат најсоодветниот материјал и начинот на изработка. На креаторите на овој проект особено им било важно во процесот да бидат вклучени одржливи практики на создавање и да бидат искористени што повеќе еколошки материјали и текстилен отпад од домашната индустрија.
„Заедно со локалните занаетчии успеавме да направиме модна приказна од уникатни парчиња, како спој на традицијата и современото“, вели Мршиќ.
За изработка на една чанта се потребни две недели и вклучени се минимум тројца занаетчии, а дизајнерскиот процес е поддржан од Бугарската амбасада во Скопје и од Фондот за иновации.
Носител на проектот е „Еснаф“, бренд за етички произведени модни додатоци, а чантите изработени со техника на таписерија може да се купат онлајн на www.esnaf.mk.
Еснаф
Од моделот „Каделка“ се достапни два дизајна (7.490 и 9.900 денари), а моделот „Каделка 2 тот“ чини 5.690 денари. Колекцијата „Наследство“ е достапна и во салонот за продажба на реставриран мебел „Урбан олд“ (Urban Old), каде што е реализирана и промотивната фотосесија.
Изабела Соколовска, основачката на „Еснаф“, открива дека најмногу нарачки имаат од Америка, Австралија и од Европа.
„Тоа се главно места каде што живеат наши иселеници, кои сакаат да носат парче традиција со себе“, вели таа.
Во онлајн продавниците на „Еснаф“ се продаваат и другите рачно направени модни додатоци од истата колекција, а тоа се плетени и везени чанти, ткаени појаси и обетки изработени од остатоци од кожарската индустрија.
„Еснаф“ како бренд наскоро ќе лансира уште една колекција чанти, овој пат во соработка со докажаниот моделар и дизајнер Изет Цури, кој пред да се врати во Македонија речиси половина век беше активен на француската модна сцена.
Еснаф
Компанијата работи и на 3Д-дизајн на версатилна чанта во соработка со Ана Јаким, претседателката на непрофитабилното движење „Фешн револушн Македонија“ (Fashion Revolution Macedonia), кое се залага за поголема одржливост и етичност во модната индустрија.
„Со оваа колекција и со тие што наскоро следуваат, верувам дека ’Еснаф’ ќе стане целосно одржлив модел и ќе расте уште повеќе на интернационалниот пазар“, вели Соколовска.
