Торн, приватен остров со површина од 2,5 акри кај брегот на Пемброкшир во југозападниот дел на Велс, се продава за 3 милиони фунти (3,9 милиони долари) преку агенцијата „Страт и Паркер“ (Strutt & Parker). Тврдината од времето на викторијанската ера била изградена како одбранбен пункт за морнаричката база Милфорд Хејвен, а може да се пристапи само со брод или хеликоптер. Објектот е целосно реновиран, со вкупна површина од 8.119 квадратни стапки и содржи пет спални соби и бар на покривот. Островот Торн е целосно самостоен, опремен со генератори, соларни панели и топлотни пумпи.
Ова крајбрежно обележје моментално е во сопственост на технолошкиот претприемач Мајк Конер, поранешен главен извршен директор на „Апсброкер“ (Appsbroker). Тој го купил островот во 2017 година, откако видел видео за него на Јутјуб. Во тоа време бил напуштен, но Конер го увидел потенцијалот за проект и сакал предизвик. „Чувствувам дека кога седиш во канцеларија, понекогаш ти треба нешто што ќе те стимулира надвор од семејството и пријателите“, вели Конер за купувањето на тврдината. „Торн беше одличен начин за намалување на стресот“.
Конер со воодушевување зборува за детското чувство на чудење што го доживува секојпат кога ќе го посети својот островски имот. „Јас го доживувам како многу скап воз за играње“, вели тој. „Тоа е само место каде што одиш со чамец, си играш со кран и генератори и поправаш нешто“. Конер додава дека на островот имал и одлични забави, вклучувајќи и едно незаборавно случување кога 80 гости преноќиле. „Тоа е толку поинакво опкружување. Никој не гледа во телефон, сите се возбудени околу чамците и самото присуство овде“, вели Конер. „Иако е оддалечен само околу 300 метри од копното, се чувствувате како да сте во друга земја“,
Главниот влез води низ историските порти во хол со отворен концепт, кој обединува приемен простор, трпезарија и дневна соба со откриени тули. Спалните соби се распоредени по должината на надворешните ѕидови на тврдината и нудат панорамски поглед на крајбрежјето на Пемброкшир.
Конер се сеќава на деновите кога работел од канцеларијата што самиот си ја уредил на островот, гледајќи како соколи летаат покрај прозорецот и рибари со јастози пловат наоколу. „Тоа е прекрасен контраст со работата оддома, каде што низ прозорец гледате во улица“.
Тој вели дека сега решил да го стави островот на пазарот затоа што неговото семејство ретко оди на Торн. „Имаме доста убава јахта во Хрватска, а децата ми се на 22, 19 и 14 години и повеќе сакаат да пловат по Медитеранот со јахтата отколку да одат во Велс“.
Тврдината што доминира на островот била изградена во 1850-тите години, во период кога Велика Британија била загрижена за моќта на француската морнарица. Можела да смести околу сто војници. Со текот на времето, нејзината важност како воена станица опаднала, па владата ја продала во 1932 година и објектот бил пренаменет во хотел, пред повторно да биде оставен на пропаѓање. Конер вели дека кога го купил имотот, тврдината била во многу лоша состојба и барала голема инвестиција. Потрошил околу 2 милиони фунти за купување и реновирање.
Кога Конер ја купил тврдината, таа била полна со вода и без електрична енергија. „Тоа беше најгледаниот имот на Рајтмув (Rightmove) таа година, а беше напуштен“, вели тој. „Идејата да се реновира зграда и да се размислува како новите технологии за снабдување со вода и енергија би се вклопиле со тоа што го направиле викторијанците, ми беше многу интересна“, вели тој.
Во текот на четирите години на реновирање, градежен тим живеел во оригиналните касарни на островот и се враќал на копното во ротации. Чамците не биле доволни за пренос на потребните материјали, вели Конер, па затоа имало „два спектакуларни дена на транспорт со хеликоптер“, за време на кои основните градежни материјали биле пренесени по воздушен пат на островот.
„Имавме осум луѓе на островот и осум на копното, кои ги поврзуваа различните товари со хеликоптерите и се враќаа напред-назад“, вели тој. „Тоа навистина беше епски потфат“. Градежниот тим исто така инсталирал кран висок 10 метри (33 стапки) со сопствен мотор за да го олесни процесот.
Конер вели дека самата природа на островот направила одредени аспекти од изградбата особено комплицирани. „Бидејќи надвор од островот имате плима и осека со разлика од 8 метри, не можете да ги оставите чамците. Мора да ги извлечете од водата. Ако плимата се повлекува, ќе останат да висат на јаже“, вели тој. „Па, имаше куп работи што моравме да ги направиме за изградбата да биде изводлива“.
Осигурувањето дека тврдината ќе може да функционира надвор од електричната мрежа – и тоа на одржлив начин – исто така било предизвик, додава тој, вклучувајќи го и процесот на инсталирање биодигестер за преработка на отпад.
„Требаше да се ископа дворот и да се направи многу длабока дупка за уредот за преработка на отпад, бидејќи во времето на викторијанците отпадните води едноставно се испуштале директно во морето – а тоа денес веќе не смее да се прави во заштитено морско подрачје“, вели Конер. Сега островот има соларни панели и сопствен генератор за топлина и вода, што го прави целосно самостоен.
Тврдината Торн денес е пред сè место за забава за пријателите и семејството на Конер и неколку ВИП-гости, вклучувајќи го и англискиот рагби-играч Бен Морган, кој доаѓа со хеликоптер. Распоредот нуди голем простор за дружење: тврдината има голема тераса, просторија за игри и бар на покривот.
Конер вели дека следниот сопственик на Торн би можел да биде некој ексклузивен хотелиер, кој сака да го претвори островот во имот во стилот на Сохо фармхаус (Soho Farmhouse). „Или јутјубер што сака совршена заднина“, додава тој.
Сепак, Конер вели дека Торн ја исполнил својата првобитна цел за него. Тој вели дека научил многу во изминатите осум години ,без разлика дали станува збор за управување со чамци во бури, за поставување обновливи извори на енергија или за создавање сигурен систем за пивка вода надвор од мрежа. „Имаше бескрајно многу интересни предизвици“, вели Конер. „И навистина уживав“.
.webp){kind=icon}
Во моментов нема коментари за веста. Биди прв да коментира...