.webp){kind=icon}
Марихуаната доаѓа на бензинските пумпи во САД.
„Грин тамб“ (Green Thumb Industries Inc.), еден од најголемите американски производители на канабис, потпиша договор со синџирот маркети „Сркл кеј“ (Circle K) за продажба на лиценцирана марихуана на бензински станици во Флорида. Партнерството ќе започне следната година на 10 од вкупно 600 локации на компанијата во државата, соопшти Green Thumb.
Станува збор за договор кој е реткост, имајќи предвид дека легалната марихуана досега се продаваше само на специјализирани места во САД и во аптеки во земји како Уругвај и Германија. Со продажбата на марихуана, која сè уште е нелегална на сојузно ниво, на бензинските пумпи каде што муштериите купуваат основни производи како грицки и цигари, партнерството може да придонесе за уште поголема распространетост на оваа дрога во секојдневието.
„Договорот ќе продолжи да ја нормализира употребата на марихуана преку нејзино вклучување во редовните производи за широка потрошувачка“, рече во интервју главниот извршен директор на Green Thumb, Бен Ковлер. „Ова е договор на иднината“, додава тој.
Bloomberg Mercury
Финансиските услови меѓу партнерите засега не се откриваат. Според договорот, Green Thumb ќе изнајмува простор на локациите на Circle K и ќе ја продава марихуаната.
Пунктовите на Green Thumb ќе бидат познати како продавници RISE Express и ќе имаат засебен влез од бензинската пумпа. Бидејќи Флорида е една од неколкуте држави каде што канабисот може легално да се продава само за медицинска употреба, купувањата ќе бидат ограничени на жителите на Флорида кои имаат картички за медицинска марихуана. Во моментот, тоа се околу 700.000 луѓе.
Се чини дека бензинските пумпи се погодни за продажба на марихуана бидејќи тие и онака се локации каде што многу Американци купуваат производи ограничени според возраста, како што се тутун и алкохол. Некои локации веќе се впуштија во бизнисот со канабис, продавајќи CBD производи кои не содржат психоактивна состојка THC и Delta-8 вредности, кои исто така ја изменуваат состојбата на свест кај корисниците, но паѓаат низ правна дупка бидејќи потекнуваат од коноп.
Ковлер од Green Thumb вели дека од Circle K има интерес за соработка и во други сојузни држави. Во Канада, каде што рекреативната употреба на марихуана е легална, ланецот има договор со трговецот на мало со канабис Fire & Flower Holdings Corp., што вклучува отворање продавници во непосредна близина на локациите на Circle K.
Аналитичарите велат дека ваквите вести би можеле да бидат поттик за секторот. Ендрју Партениу од Stifel го нарекува чекорот „прва значајна точка кон регулација“ откако претседателот Џо Бајден објави ревизија за марихуаната на сојузно ниво, при што аналитичарот нагласува дека „чекорот кон пунктови на заеднички локации може да биде основа за прифаќање од страна на општеството”.
