text size
Лионел Меси можеше да стане заштитно лице на аргентинскиот пезос, бидејќи во фудбалската еуфорија и Централната банка на земјата разгледувала начини како да му оддаде почит на победникот на Светското првенство.
По многу постигнати голови, големи соништа и порази, фудбалската легенда конечно го подигна трофејот во неделата (18 декември) во име на својата нација.
Признанијата за Меси ќе продолжат да доаѓаат, а и во Централната банка на Аргентина (BCRA) имало предлози ликот на фудбалската ѕвезда да заврши на банкнотата од илјада пезоси, бидејќи цифрата започнува со бројот на неговиот дрес (10), според весникот „Ел финансиеро“ (El Financiero).
Весникот, исто така, известува дека BCRA размислува да го стави Ла Скалонета (La Scaloneta) на задната страна од банкнотата, што е прекар за аргентинскиот тим предводен од селекторот Лионел Скалони.
Како што пишува „Ел финансиеро“, идејата на шега ја изнеле членови на аргентинската централна банка, но банкарските лидери не ја прифатиле.
Директорите Едуардо Хекер и Лисандро Клери се согласиле дека дизајнот на банкнотата би го „разбудил колекционерскиот дух на Аргентинците“.
BCRA издаде комеморативни монети кога Аргентина го освои своето прво Светско првенство во 1978 година, како и за време на прославите за двегодишнината и за 50-годишнината од смртта на Ева Перон.
.webp){kind=icon}
