Може да претпоставите дека Бил Акман, извршниот директор на „Першинг сквер капитал“ (Pershing Square Capital Management), кој управува со буџет од 17 милиони долари, и Стив Аоки, познатиот електро и техно диџеј, препознатилив по своите „диви“ изведби, немаат ништо заедничко. Но, се чини дека книжевниот вкус ги поврзува луѓето кои инаку никогаш не би се сретнале. Секоја година, „Блумберг“ објавува листа на најпродавани книги на некои од најголемите светски бизнис лидери и влијателни лица. Избравме пет препораки кои би можеле да им помогнат на оние за кои успехот е на врвот на нивните новогодишни одлуки...
"The Yellow Pad: Making Better Decisions in an Uncertain World" - Robert E. Rubin
Како студент во втора година на факултет, Роберт Рубин бил на час што му го променил животот. Предавањето било вовед во филозофија, а професорот на своите студенти им всадил идеја која изгледа едноставна, но е и длабока: Не постојат такви работи како безбедност. За Рубин, ова довоело до исклучително важно прашање: Како можеме да донесеме правилни одлуки во фундаментално несигурен свет? Поранешниот министер за финансии и ко-основач на „Голдман Сакс“ (Goldman Sachs) ги споделува своите размислувања во овој дел и дава помош при донесување одлуки и справување во несигурни времиња.
"Scaling People: Tactics for Management and Company Building" - Claire Hughes Johnson
Практичен водич за градење компанија и проширување на најважниот ресурс што го има една компанија: нејзините луѓе. Врз основа на речиси дведецениското искуство како извршен директор во „Гугл“ (Google) и „Страјп“ (Stripe), авторката дава корисен увид и тактички насоки за сè, од изготвување документи до вработување, развој на тим, повратни информации и механизми за оценување на перформансите. Книгата содржи преку 100 страници со работни листови, шаблони, вежби и примероци од документи за да им помогне на основачите, лидерите и менаџерите на компаниите да создадат издржани оперативни системи и едноставни процеси кои навистина функционираат.
"Leadership: Six Studies in World Strategy" - Henry Kissinger
Конрад Аденауер, Шарл де Гол, Ричард Никсон, Анвар Садат, Ли Куан Џиу и Маргарет Тачер - многумина би се запрашале што ги поврзува. Покрај тоа што вештините на овие државници се тема на книгата на неодамна починатиот автор Хенри Кисинџер, заедничко им е тоа што Кисинџер или лично ги познавал или учествувал во многу настани поврзани со нивните постапки. Самиот тој е еден од најпознатите американски дипломати и државници на 20 век, и како автор носи историска перцепција и лично знаење за државничкото творештво персонифицирано преку изборот на овие лидери, врамени во стратегии кои можат да бидат корисни при сите форми на управување и дејствување.
Хенри Кисинџер
Bloomberg
"Sailing Upwind: Leadership and Risk From TopGun to the Situation Room" - Admiral James “Sandy” Winnefeld
Џејмс Винефелд ја започнал својата кариера како пилот на борбен авион Ф-14 и инструктор во елитната програма за обука на пилоти „Топган“ (TOPGUN). Потоа командувал со носач на авиони, по што имал различни високи позиции на пат кон функцијата потпретседател на Здружениот штаб на воените сили. Но, ова дело е многу повеќе од само уште еден потсетник за возбудливата кариера на угледен поранешен поморски офицер. Книгата нуди размислувања за тоа како тој ги прифаќал и управувал ризиците на своето патување, како и концизни описи на квалитетите кои мора да се развијат за да се стане успешен лидер. Самиот наслов, кој ја опишува тактиката во која едрилицата мора да се движи спротивно од главниот правец на ветрот за да напредува во посакуваната насока, е метафорично навестување на главната вештина која ги опфаќа сите тактики што авторот ги опишува низ книгата.
"Unsupervised: Navigating and Influencing a World Controlled by Powerful New Technologies" - Daniel Doll-Steinberg & Stuart Leaf
Вештачка интелигенција, блокчејн, токенизација, квантно пресметување и виртуелна реалност: што значат сите овие технологии и како стигнавме до овој вртоглав момент во нашата историја. Покрај тоа што опишува што секоја од овие технологии може да направи во економска и деловна смисла, оваа книга го зема предвид и човечкиот аспект. Авторите, потпирајќи се на децениското искуство во градење и имплементирање на иновативни технологии, како и советување бизнис лидери, влади и национални тела за управување, се фокусираат на тоа како таквите технологии можат да влијаат на нашите животи и општество и кој управува со нив. Исто така, се дискутира за прашањето на етиката и што би можело да се случи ако овие технологии се развијат неконтролирано.
.webp){kind=icon}
Во моментов нема коментари за веста. Биди прв да коментира...