Глобалниот пазар на грижа за миленици би можел да достигне вредност од 236,16 милијарди долари до 2030 година, со комбинирана годишна стапка на раст од 5,1 отсто, пишува во последниот извештај на „Гранд вју рисрч“ (Grand View Research). Како главни причини за ваквиот силен раст се наведуваат зголемената свест за благосостојбата на животните и тенденцијата милениците да се третираат како членови на семејството.
Сепак, експертите посочуваат уште еден важен фактор, а тоа е технолошкиот напредок. Дигитализацијата, според нив, не само што ја олеснува дневната грижа за домашните миленици туку создава и нови бизнис-можности. Постојано се промовираат нови иновации, од паметни хранилки и играчки до апликации за ветеринарни консултации, а понудата на вакви дигитални решенија расте и во регионот Адрија. Од неодамна, конечно и Македонија се приклучи кон овој тренд.
Со проекција да ја промени перцепцијата за грижата за миленици, младата претприемачка Деспина Здравкова во март годинава создаде платформа за шетање, чување и сместување домашни миленици.
„Барањето комфорен престој за моите миленици додека патувам доведе до тоа да согледам дека освен хотелско и пансионско сместување, во Скопје не постои друга алтернатива за миленици што се социјално анксиозни или едноставно сакаат ВИП-третман. Тоа беше појдовна точка, а другото следуваше природно“, вели Здравкова во разговор за „Блумберг Адрија“.
Фото: Ања Калин
„Скубер“ (Scoober) е стартап во кој вложила неколку илјади евра. Таа раскажува дека тоа што започнало како мала идеја, за само неколку месеци прераснало во заедница на луѓе што веруваат дека секое милениче заслужува внимание, сигурност и љубов. Интересна е и приказната за името.
„Зборчињата што ми се вртеа во глава беа ‘Скуби Ду’ (Scooby Doo) и ‘Убер’ (Uber). Патување за вашите миленици. Сакам ‘Скубер’ да биде возбудливо патување за нив наместо стресен период“, појаснува таа.
Овој нејзин проект е значаен чекор во модернизацијата на македонскиот пазар за грижа за миленици. На корисниците им се нуди можност да ги прегледуваат профилите на овластените негуватели, да читаат оценки и коментари од други сопственици, но и да добиваат фото и видеоажурирања за своите миленици во реално време.
Платформата функционира како бизнис-модел што поврзува две страни - шетачи и ситери од едната и сопственици на миленици од другата. Достапни се четири услуги: шетање кучиња, сместување миленици (во домовите на нивните ситери), чување миленици или дневна грижа во домот на клиентите и кратка посета на мачиња и други миленици.
Ања Калин
Цените варираат во зависност од тоа дали барате еднократна услуга или континуирано згрижување за вашето милениче. Дневна прошетка чини 400 денари, а за пакет од 40 прошетки месечно ќе треба да одвоите 14.400 денари.
„Цените се приспособени за нашиот пазар. Иако секој миленик добива ВИП-третман, услугите може да си ги дозволи секој сопственик. Закажувањето преку веб-страницата е едноставно и брзо, потребни се само два клика, а за поголеми резервации следува и попуст“, информира Здравкова.
Пазарот за ваков тип на услуги во Македонија сè уште е нов, па довербата меѓу корисниците и давателите на услуги допрва се развива. Нашата соговорничка објаснува дека сигурноста ја гради со сериозен пристап кон селекцијата на персоналот, но и кон извршувањето на договорените услуги.
„Довербата ја стекнуваме со транспарентност на целокупниот процес и многу комуникација со сопствениците, а тоа значи техничка поддршка од 24 часа. Во моментов најголем предизвик ни е да обезбедиме ситери во секоја населба. Сѐ друго досега се одвива со леснотија“, вели таа.
Ања Калин
Здравкова со нејзиниот тим има неколку стратегии за развој. Во блиска иднина таа планира надградување на платформата со апликација што уште повеќе ќе го олесни работењето, но и проширување на услугите.
„Ова е само почеток. Возбудени сме за тоа што следува и подготвени сме да градиме иднина во која секое милениче ќе се чувствува згрижено, а секој сопственик спокојно“, порачува Здравкова.
.webp){kind=icon}
