text size
Планинскиот картинг станува сериозно барана атракција во летниот период. Ова уникатно возење на три тркала веќе не е примамливо доживување само за туристите на кои очајно им фалат скијачките терени во јули и август, туку и за оние што поради екстремните горештини овие месеци од годината сè повеќе се одлучуваат да ги поминат на планина наместо на плажа.
Станува збор за адреналинско искуство со надворешно рекреативно возило, кое е комбинација од картинг, велосипед и санка. Тоа е специјално дизајнирано за спуштање по патеки по надолнини, особено на планински или ридски терени. Овие колички со гравитација им овозможуваат на корисниците да се движат по падините со различна брзина. Популарни се во планинските одморалишта и скијачките области во текот на летните месеци, кога нема снег, и во авантуристички паркови што нудат различни активности на отворено.
Планински картинг се нуди и во Македонија. Трета година по ред тој е една од најбараните содржини во адреналинскиот парк „Панорама ол сизанс“ (Panorama All Seasons) во Крушево. Оттаму велат дека оваа возбудлива и достапна активност е одлична опција за оние што сакаат да пробаат нешто ново и авантуристичко во планинските региони. Освен од домашни гости и посетители од соседните земји, сè повеќе резервации имаат од туристи, особено параглајдеристи, од подалечни земји во Европа, кои доаѓаат во Македонија за натпревари и меѓусебни дружења.
Турите се реализираат на скијачките терени во Крушево. Може да се пријави минимална група од четири лица, со минимално возење од четири спуштања. Пакетот чини 2.000 денари.
Depositphotos
Од „Панорама ол сизанс“ појаснуваат дека минималната возраст се одредува во зависност од специфичните барања за безбедно ракување со количките, но дека таа генерално се движи од 10 до 14 години. Некои адреналински паркови може да имаат барања и за висината и тежината, за да се осигурат дека учесниците можат правилно да го контролираат картингот и безбедно да се вклопат.
„Учесниците треба секогаш да внимаваат на правилна употреба на количките, односно да ги следат упатствата дадени од операторите или водичите. Треба задолжително да носат соодветна заштитна опрема за да го минимизираат ризикот од повреда и да покажат свесност за околината, да внимаваат на другите возачи и на пречките на патеката“, велат од македонската компанија што располага со десет картинг-колички.
Depositphotos
Овие возила имаат три тркала затоа што на тој начин се обезбедуваат стабилност и маневрирање на нерамни терени. Тие се со робусна цврста рамка направена од издржливи материјали како челик или алуминиум, изградена да издржи груба употреба. Имаат низок центар на гравитација, кој обезбедува стабилност и го намалува ризикот од превртување при брзи вртења или на стрмни падини, и се опремени со големи пневматски гуми, кои нудат добра влечна сила и апсорпција на удари на нерамни патеки. Количките имаат сигурен систем за сопирање, со рачни сопирачки слични на оние на велосипедите, за да се контролира брзината и да се обезбеди безбедност. Рачките овозможуваат прецизна контрола при движење по надолнина.
За разлика од планинскиот велосипедизам или скијањето, планинскиот картинг не бара претходно искуство, што го прави достапен за пошироката публика и популарна семејна активност.
Нашите соговорници велат дека планинскиот картинг може да биде просперитетен бизнис доколку стратегиски се имплементира.
„Освен што е погоден за широк опсег на возрасти, што го прави атрактивна опција за семејствата, идеален е за групни настани, корпоративни излети и тимбилдинг-активности. Партнерство со сместувачките капацитети, хотели и апартмани може да помогне да се привлечат повеќе посетители, а нудењето попусти за групи, за локалното население или за часовите ’надвор од шпицот’ може да го зголеми протокот на клиенти“, велат од компанијата.
.webp){kind=icon}
