Меси му се придружи на Роналдо во групата фудбалски милијардери

Кога Лионел Меси беше тинејџер, доби понуда што му го промени животот - да се приклучи на младинскиот тим на ФК Барселона. Договорот, неформално напишан на салфетка, содржеше необична клаузула: обврска клубот да ги покрие трошоците за неговиот третман со хормон за раст.

Неговиот локален аргентински клуб, Њуелс Олд Бојс, претходно го одби договорот, сметајќи го за преголем ризик за недокажан играч. Но за Барселона тоа се покажа како најдобро потрошени пари: терапијата беше успешна, а кариерата на Меси експлодираше, носејќи му нему и на шпанскиот клуб светска слава. Надвор од теренот, тој неодамна достигна уште еден голем успех - стана редок спортски милијардер.

Меси, кој има 38 години, заработи повеќе од 700 милиони долари во плати и бонуси од 2007 година, според анализа на „Блумберг“. Со прилагодување за даноци, пазарни перформанси и приходи од инвестиции и спонзорства, неговото богатство ја надмина границата од 1 милијарда долари, според Bloomberg Billionaires Index. Тоа го става рамо до рамо со неговиот долгогодишен ривал Кристијано Роналдо, кој стана првиот милијардер во спортот откако се приклучи на клубот Ал-Наср во Саудиската Про Лига во 2023 година.

Додека Роналдо одамна е магнет за реклами - од нафтени производи до спортска опрема - маркетинг машинеријата на Меси во раните години понекогаш заостануваше зад неговиот талент на теренот. Но во поново време, под водство на неговиот татко Хорхе, неговата бизнис кариера процвета. Огромната плата од сегашниот клуб Интер Мајами, наводните договори за делење ТВ приходи, недвижностите и дури и уделот во аргентински синџир ресторани го доведоа во „клубот со десет цифри“.

Тоа можеше да се случи и порано. Многумина беа изненадени кога Меси, веднаш по освојувањето на Светското првенство со Аргентина во 2022 година, одби огромен договор вреден 400 милиони долари годишно за да игра во Саудиската Про Лига. Наместо тоа, тој избра да се приклучи на Интер Мајами, додека Роналдо потпиша сопствен договор во Саудиска Арабија во 2023 година, вреден над 200 милиони долари годишно.

„Парите никогаш не ми биле проблем, ниту пречка за било што,“ изјави Меси за „Мундо депортиво“ во интервју таа година. „Ако беше заради пари, ќе отидев во Саудиска Арабија или некаде на друго место.“

Bloomberg Mercury

Историски гледано, спортисти кои заработиле над 1 милијарда долари најчесто го постигнале тоа преку инвестиции. Роџер Федерер заработи повеќе од 130 милиони долари во наградни фондови за време на кариерата – но неговиот удел од 3 отсто во швајцарскиот бренд за патики „он“, купен во 2019 година, стана најголем извор на неговото богатство откако акциите нагло пораснаа.

Мајкл Џордан, иако беше еден од најплатените НБА играчи во своето време, заработи помалку од 100 милиони долари во плати, а неговиот удел во Шарлот хорнетс  и спонзорските договори беа главниот извор на богатство. Сепак, последниот раст на платите на врвните спортисти, особено во фудбалот, им овозможи на најголемите ѕвезди да достигнат милијарда долари само од плати.

Договорот со Интер Мајами му донесе и иновативни бенефиции, вклучувајќи необична опција за сопственички удел што му дава право да купи дел од клубот, каде што веќе е акционер пензионираниот англиски ас Дејвид Бекам.

Иако не е јасно дали Меси навистина презел удел во својот американски тим, вредноста на Интер Мајами е во пораст. Според „Спортико“, клубот пораснал за повеќе од една петина во годината до февруари, достигнувајќи околу 1,45 милијарди долари. Тој е највредниот фудбалски клуб во САД, рангиран 16-ти на глобално ниво и пред тимови како Њукасл Јунајтед.

Договор со „Епл“

Преминот на Меси во САД отвори и други иновативни начини на плаќање. За време на првичните преговори за договор, американската фудбалска лига и„Епл“ разговарале за договор за делење приходи, според кој Меси би добивал дел од продажбата на нови претплати за „МЛС сизн пас“ пакетот на „Епл ТВ +“, објави „Атлетик“.

Џорџ Мас, сопственикот на Интер Мајами, изјави дека бројот на претплати на стриминг услугата се удвоил во месеците откако играчот се приклучи. Мас, во интервју претходно оваа година, посочи дека годишната плата на Меси од клубот изнесува меѓу 70 и 80 милиони долари, земајќи ги предвид правата на сопственички удел и играчката компензација.

Bloomberg Mercury

„Блумберг“ не успеа независно да ги потврди финансиските детали од договорот на Меси со „Епл“. Обидите да се контактира семејството Меси преку нивниот портпарол останаа без одговор.

Спортска перспектива

Од чисто спортски аспект, преминот во Интер Мајами од некои навивачи беше гледан како чекор надолу, следејќи ја веќе познатата патека на искусни ѕвезди кон помалку престижни фудбалски нации кои плаќаат за звучни имиња. Пред тоа, Меси - кого многумина го сметаат за најдобар играч на сите времиња - помина две години во францускиот гигант Пари Сен Жермен, а претходно ја предводеше Барселона до бројни титули во Шпанија и Европа. Тој има освоено повеќе „Златни топки“ од кој било друг играч.

Иако уште во 2000-тите се развиваше во ѕвезда во каталонскиот клуб, му требаше време неговата плата навистина да порасне: кога потпиша продолжување на договорот во 2009 година, шпанските медиуми објавија дека заработува околу 12 милиони долари годишно. Денес, растот на платите е толку голем што минатата сезона десет играчи во клубот заработувале повеќе од таа сума.

Меси поминал повеќе од половина живот во Шпанија и сè уште има силни врски со Барселона, но ретко дава интервјуа за медиуми надвор од Аргентина. Иако е широко славен во својата татковина, особено по победата на Светското првенство во 2022 година, во раните години се бореше со популарноста, делумно поради неговата срамежливост и споредбите со Диего Марадона. Тоа е нешто со кое се соочува и денес. Во едно интервју за аргентинска стриминг платформа оваа година, се опиша со локален термин за социјално несмасна личност, додавајќи дека се вознемирува кога му се менуваат дневните планови и дека гледањето телевизија сам дома е меѓу неговите омилени занимации.

Бизнис надвор од теренот

Меси во голема мера се потпира на својот татко Хорхе за деловните активности надвор од фудбалот, кој му е агент, менаџер и советник. Алфонсо Небот Армисен, малку познат шпански банкар, ја води неговата приватна инвестициска фирма од 2009 година.

Bloomberg Mercury

Сепак, неговиот бизнис понекогаш привлекувал внимание од шпанските даночни власти, заедно со други играчи како Роналдо. Пред една деценија, тој беше прогласен за виновен, заедно со Хорхе, за измама на шпанската влада во износ од околу 4 милиони евра меѓу 2007 и 2009 година, преку приходи што биле префрлени во фиктивни компании. Добил затворска казна и парични глоби, но на крајот избегна затвор.

Диверзификација на инвестициите

Од тогаш, Меси започна да диверзифицира. Во декември 2024 година, тој листираше  инвестициски фонд за недвижности на мала шпанска берза, вреден 232 милиони долари. Компанијата поседува неколку хотели и други комерцијални недвижности.

Исто така, се прошири и во секторот на потрошувачки производи: во 2024 година ја лансираше спортската напивка „Мас+ бај Меси“ (Más+ by Messi) во партнерство со „Марк Антони интернешнел СРЛ“. Дополнително, стана инвеститор во аргентинскиот синџир ресторани „Ел клуб де ла Миланеса“ (El Club de la Milanesa), кој е специјализиран за панирано месо – едно од омилените јадења на Меси и традиционален дел од латиноамериканската кујна – со цел да помогне во меѓународната експанзија на брендот.

Фудбалски клубови

Слично како Роналдо, а можеби и со поглед кон деновите по завршувањето на кариерата, Меси гради портфолио од фудбалски клубови. Неодамна беше објавено дека го купува шпанскиот клуб Корнела од петта лига, додавајќи го на својот удел во Депортиво ЛСМ, уругвајскиот тим кој го поседува заедно со својот пријател и поранешен соиграч Луис Суарез.

Семејството Меси исто така основа и управува со клубот Лос Леонес во нивниот роден град Росарио, кој игра во пониска лига.

Bloomberg Mercury

Поглед кон иднината

Можно е да следуваат уште инвестиции, бидејќи Меси почнува да размислува за пензија. На бизнис форум во Мајами минатата година изјави:

„Фудбалот има рок на траење. Бизнисот е нешто што ми се допаѓа и за кое учам.“