Златниот Меси стана опсесија: сликичките на „Панини“ покренаа „мини економија“ во Аргентина

Додека Лионел Меси се подготвуваше да излезе на теренот за првиот натпревар од неговото шесто и последно Светско првенство во фудбал, Аргентинците бркаа поинаков трофеј: неговата недостижна златна сликичка.

Илјадници деца и возрасни се собираат секој викенд пред првенството во „Парк Ривадавија“ (Parque Rivadavia), историски парк во центарот на Буенос Аирес, каде што колекционерите разменуваат поштенски марки, монети, а сега и сликички „Панини“ за да ги наполнат своите албуми со ликовите на сите играчи што ги претставуваат 48-те екипи што се натпреваруваат на Светското првенство.

Откако го освои последниот турнир во 2022 година, Меси е крал.

„Ако ја добијам, ќе ја чувам до крајот на животот. Ќе спие со мене“, рече 14-годишниот Франко Лоџурато.

Овогодинешниот албум има простор за 980 сликички, а италијанскиот производител нуди 20 дополнителни ретки колекционерски сликички со најпопуларните играчи, секоја достапна во виолетова, бронзена, сребрена и златна боја. Една дополнителна колекционерска сликичка се појавува во просек на секои 100 пакетчиња, изјавија од компанијата за „Блумберг“.

Размена на сликички „Панини“ од Светското првенство во фудбал во паркот Ривадавиа во Буенос Аирес. Фотограф: Сара Пабст / Блумберг

Колекционерите ги полнат албумите со сликички од играчите коишто ги претставуваат 48-те репрезентации на Светското првенство. Фотограф: Сара Пабст / Блумберг

 

Лоџурато веќе го наполнил својот албум - што го чинело неговиот татко цела плата - и сега сака златна сликичка на Меси.

„Само замислете“, рече тој. „Ова е последното Светско првенство на Меси. Тоа е злато.  Мислам, тоа е највредното нешто што постои.“

Лудилото предизвика недостиг и ги зголеми цените. „Панини“ препорачува продажба на пакетче со седум сликички за околу 1,40 долари, но киосците и малите продавници што успеваат да набават залихи наплаќаат и до 2,10 долари, според Ернесто Акуња, челник на синдикатот на киосци.

За време на последното Светско првенство, левичарската влада на Аргентина интервенираше поради недостигот. Под либертаријанскиот претседател Хавиер Милеи, Акуња рече дека здружението не се занимавало со тоа прашање.

 И возрасните и децата се зафатени од треската по сликичките од Светското првенство.  Фотограф: Сара Пабст / Блумберг

Популарноста на сликичките „Панини“ предизвика недостиг и ги крена нивните цени. Фотограф: Сара Пабст / Блумберг

 

„Тоа е мини-економија“, вели 25-годишниот Томас Мингроне, кој ги поминува викендите купувајќи, продавајќи и разменувајќи дупликати. Тинејџер штотуку му пристапи нудејќи му ја обичната сликичка со Меси. Мингроне му понуди 10,50 долари, но продавачот си замина.

„Тука има 12 или 13-годишни деца кои заработуваат и по 100 долари дневно. Неверојатно е“, рече тој.

Децата на аргентинската суперѕвезда исто така учествуваат во забавата, рече Меси во неодамнешно интервју, и се зафатени со собирање комплетен сет сликички за нивните албуми.

  „Битката е добиена“

Мингроне тврди дека знае како да ги идентификува пакетчињата што ги содржат дополнителните колекционерски сликички и ги продава неотворени за 17,49 долари секое. Лоџурато купил две, но не го нашол својот златен Меси. Мингроне проценува дека отворил околу 20.000 пакетчиња и пронашол само две златни верзии на посакуваната аргентинска мегаѕвезда.

Сантјаго Арсе, 22, бил еден од ретките среќници што пронашле златен Меси и го нуди на продажба за 140 долари. За да го добие, Арсе разменил четири исто така многу барани колекционерски сликички - Португалецот Кристијано Роналдо, Французинот Килијан Мбапе, Египќанецот  Мохамед Салах и Англичанецот Џуд Белингам - заедно со 10 други одлични сликички и 25 стандардни играчи.

„Секоја дополнителна сликичка има своја приказна. Секоја е битка што е добиена“, рече Арсе.

Сантјаго Арсе со златната сликичка на Меси во раката. Фотограф: Сара Пабст / Блумберг

Додека аргентинската ѕвезда Лионел Меси игра на неговото последно Светско првенство, сликичките ос неговиот лик се многу барани. Фотограф: Сара Пабст / Блумберг

 

Не секој во паркот ја бара златната верзија. Единаесетгодишниот Тахиел Кортез штотуку извадил обична сликичка на Меси од пакетчето и се насмеа од уво до уво.

„Не можам да поверувам“, рече тој. „Го имам Меси!“

Сè уште му требаат 120 сликички за да го заврши албумот. Но, за момент, тоа изгледаше речиси неважно.

Почнувајќи од 15 јули, „Панини“ ќе понуди поединечни сликички за продажба за да можат да се завршат албумите. Дополнителни колекционерски сликички нема да бидат достапни, објави компанијата.