Меси се збогуваше од репрезентацијата

Суперѕвездата Лионел Меси го објави своето пензионирање од репрезентацијата на Аргентина по повеќе од две децении, означувајќи  крај на една ера за јужноамериканската нација опседната со фудбал.

Триесет и девет годишникот ја предводеше Аргентина до финалето на Светското првенство на ФИФА против Шпанија минатиот месец, но бранителот на титулата загуби со 1-0 во продолжението. Меси постигна 121 гол, запиша 66 асистенции и освои шест титули за репрезентацијата, позната локално како „La Albiseleste“ поради своите бело-сини дресови. Тој е втор стрелец во историјата на светските првенства, зад францускиот напаѓач Килијан Мбапе.

„Времето истекува, фазите завршуваат, а ова е нешто што многу боли“, рече Меси во понеделник во рачно напишано писмо што го објави на својот Инстаграм профил. „Го сакам, го сакав и секогаш ќе го сакам тоа што сум дел од репрезентацијата. Дадов сè што имав. Немам што повеќе да дадам, а покрај тоа, има неколку одлични млади играчи кои заслужуваат да бидат тука.“ 

Таткото на Меси, Хорхе, почина претходно месецов. Меси во тој момент рече дека не знае „како да продолжи понатаму“. Во писмото за повлекување од националниот дрес, тој му се заблагодари на своето семејство „што секогаш беше тука, што ме придружуваше на ова патување кое беше толку убаво, но тешко“.

Аргентинската ѕвезда продолжува да игра клупски фудбал за Интер Мајами ЦФ од првата фудбалска лига на САД.

Овогодинешното Светско првенство стана љубовно писмо за Меси дома откако Аргентина го освои првенството во 2022 година, со што на нацијата ѝ донесе трета златна ѕвезда на сопствениот дрес. „За Малвините (т.е. Фокландските острови, болна тема за Аргентинците, н.з.) , за Диего, за последната на Меси“, скандираа Аргентинците додека славеа по улиците од Буенос Аирес до Патагонија, среде громогласни свирежи од автомобили и реквизити откако Аргентина ја победи Англија во полуфиналето. Меси, познат и како „la Pulga“ (шпански: болва, прекар што Меси го добил како дете бидејќи бил многу поситен од своите врсници, н.з.), е споредуван со саканиот Диего Марадона, кој ја донесе титулата дома во 1986 година.

На многу начини, турнирот во 2026 година ја отсликуваше сопствената кариера на Меси со аргентинската репрезентација, со која ги доживеа ѕвездените моменти дури во нејзиниот последен дел. Аргентина и Меси не еднаш се соочуваа со елиминација, издигнувајќи се од без малку пораз против  Зеленортските острови, Египет и Англија. Повеќето од головите на Аргентина беа постигнати по 75-тата минута.

Откако заигра за аргентинската репрезентација на 18 години во 2005 година, поранешниот играч на ФК Барселона беше жестоко критикуван од спортските коментатори за разочарувачките настапи и покрај неговата растечка слава во Шпанија. Во 2016 година, Меси накратко се повлече од репрезентацијата откако Аргентина го загуби финалето на Копа Америка од Чиле на пенали. Но, тој стана омилен кај навивачите откако го освои регионалниот турнир во 2021 година, победувајќи го најголемиот ривал Бразил. 

Sarah Pabst/Bloomberg

 

Меси ја напушти својата родна земја во 2000 година на 13 години и замина во Шпанија, каде што ФК Барселона понуди да плати за третман за хормонска инсуфициенција што неговото семејство не можеше да си го дозволи. Неговиот татко се пресели со него во каталонската престолнина, оставајќи ја мајка му и три браќа и сестри во аргентинскиот земјоделски центар Росарио.

„Фала му на Бога што ме направи Аргентинец!!“ напиша Меси. „Vamos Argentina!!“ (Напред Аргентина)