Њујорк Никс го освоија првиот шампионски трофеј во НБА лигата по 53 години

Њујорк Никс ставија крај на една од најдолгите суши без шампионска титула во НБА лигата и донесоа олеснување на своите многу трпеливи навивачи.

Тимот во неделата наутро го освои првиот трофеј по 1973 година и третиот во својата историја, откако на петтиот натпревар од финалето во гости ја совлада екипата на Сан Антонио Спарс со 94:90. Никс поголемиот дел од натпреварот беа во негатива, но повторно подготвија доцен пресврт и само неколку минути пред крајот на последната четвртина го презедоа водството.

Џејлен Брансон, кој по натпреварот беше прогласен за најкорисен играч на финалето, постигна 45 поени и го одведе Њујорк до победа над Сан Антонио.

Победата беше круна на една од најдоминантните плејоф серии во историјата на лигата. Никс во елиминациските натпревари постигнаа сооднос победи и порази 16:3, при што врзаа и 13 последователни победи и дојдоа до најголемиот пресврт во историјата на финалето.

По освојувањето на титулата, њујорчаните се собраа на улиците, танцуваа и викаа, додека низ градските квартови одекнуваа повиците „Let’s Go Knicks“. Полициските возила во знак на славење ги вклучија сирените, а навивачите се прегрнуваа и делеа петки со пријатели и непознати.

Џулио Фуентес, 33-годишник кој натпреварот го гледал во локал во Бруклин, изјави дека цел живот чекал на титула на Никс. „Вечерва живееме,“ рече тој. „Сите ќе си одат дома со насмевка на лицето.“

Титулата значи и задоволство за 71-годишниот сопственик Џејмс Долан. Навивачите со години го обвинуваа за проблемите на тимот, бидејќи се вплеткуваше во конфликти со поранешни играчи и често менуваше тренери во годините на порази.

Сега Долан е на врвот. Успехот на Никс и другите негови бизнис потфати го зголемија неговото богатство оваа година за 450 милиони долари, на 1,9 милијарди долари, според индексот на милијардери на „Блумберг“. Акциите на „Медисон сквер гарден“ (Madison Square Garden Sports Corporation), која ја контролира Долан и под која спаѓаат Никс и хокејскиот тим Њујорк Рејнџерс, годинава пораснаа за околу 50 отсто.

Претседателот Доналд Трамп, долгогодишен навивач на Никс, по саботната победа му честиташе на Долан и на тимот. „Каква година беше оваа, а уште повеќе, какви неверојатни победи во плејофот следевме, особено последните четири,“ напиша тој на Трут сошл.

Во Њујорк навивачите на Никс славеа уште една ноќ. Веќе по победата во средата на четвртиот натпревар дома, кога надоместија 29 поени, градот експлодираше од радост, а навивачите танцуваа по улиците од Бруклин до Бронкс и пред салата „Медисон сквер гарден“ на Менхетн.

Џошуа Ластра, страстен навивач на Никс, рече дека почнал да навива за тимот по преселбата од Алабама во Њујорк. „Тоа што сум жив и можам да видам како Никс освојуваат титула е благослов,“ рече тој. „Никогаш не мислев дека ќе победат. Толку сум среќен и горд на мојата држава.“

Њујоршкиот градоначалник Зохран Мамдани на мрежата X објави само четири зборови. Во една објава напиша „ИСТОРИЈА“, а во друга: „Парада. Четврток. Менхетн.“

Обложувачниците пред почетокот на натпреварите улога на фаворити ја доделија на Сан Антонио, иако Никс во претходните два круга ги елиминираа противниците со по 4:0. Сан Антонио, предводен од 224 сантиметри високиот Виктор Вембанјама, во возбудлива серија од седум натпревари ги победи актуелните шампиони Оклахома Сити Тандер и се пласираше во финалето.

Искуството на Никс се покажа како преголема пречка за помладиот тим на Спарс. На првиот натпревар во Сан Антонио, Њујорк се врати по заостанување од 14 поени во третата четвртина и победи.

На следниот натпревар Спарс направија клучни грешки во завршницата. Меѓу нив беше и невнимателно изгубената топка на Вембанјама, 22-годишната ѕвезда во подем, кој ја играше својата прва плејоф серија.

Додека „Медисон гарден“ се подготвуваше за првите финални натпревари по 1999 година, цените на билетите на платформите за препродажба нагло скокнаа. Просечната цена за третиот натпревар достигна 6.700 долари.

Трамп го зголеми спектаклот на третиот натпревар кога седна до Долан и стана првиот актуелен претседател кој присуствувал на финале на НБА. Публиката беше замолчена од враќањето на Спарс во второто полувреме, со кое го намалија заостанувањето во серијата на Никс на 2:1.

Четвртиот натпревар се покажа како пресвртен. Никс на полувремето заостануваа со 76:49. Но, 188 сантиметри високиот организатор на играта Џејлен Брансон предводеше силен пресврт, кој заврши со блокада на Ануноби 1,2 секунди пред крајот за победа.

Серијата, која ја пренесуваше мрежата „Еј-би-си“ на „Волт Дизни“, беше една од најгледаните финални серии на НБА во последните децении. Првиот натпревар го следеа околу 17 милиони гледачи, најмногу од 2018 година, а третиот достигна речиси 24 милиони гледачи, најмногу од 1998 година, кога Мајкл Џордан ја освои својата последна титула со Чикаго Булс.

Вредностите на професионалните спортски франшизи во последниве години нагло растат, главно поради очекувањата дека лигите за медиумски права ќе можат и понатаму да наплатуваат сè повисоки износи. „Спортико“  ја процени вредноста на Никс на 9,9 милијарди долари, со што клубот го стави на третото место зад Голден стејт вориорс и Лос Анџелес лејкерс.

Оваа вредност веројатно ќе порасне по последната титула. Тоа би се случило во поволен момент, бидејќи „Медисон сквер гарден спортс “ на почетокот од годината соопшти дека разгледува можност за раздвојување на Никс и Рејнџерс, чија вредност е проценета на околу четири милијарди долари, во две одделни компании.