Светското првенство постави рекорд со 62 милиони гледачи во САД

Победата на Шпанија над Аргентина во финалето на Светското првенство во фудбал во 2026 година привлече рекордна телевизиска публика во САД од повеќе од 62 милиони гледачи, вклучувајќи 38,9 милиони кои го следеле преносот на англиски јазик на „Фокс“ (Fox Corp.), покажуваат податоците на „Нилсен“ (Nielsen).

Глобалниот фудбалски шампионат, одигран на 19 јули во Њу Џерси, се емитуваше на телевизискиот канал на „Фокс“ и на стриминг-платформата Фокс уан. „Фокс“ ги поседуваше правата за пренос на турнирот на англиски јазик во САД, додека каналот „Телемундо“ (Telemundo) на „Комкаст“ (Comcast Corp.) и стриминг-платформата Пикок го емитуваа преносот на шпански јазик, кој го следеле 23,9 милиони гледачи.

„Една од најголемите потврди за нас беше тоа што Светското првенство не ја создаде американската публика за фудбал, туку всушност ја откри“, изјави Сезар Конде, претседател на НБЦ (NBCUniversal News Group), кој е надлежен и за „Телемундо“. „Мислам дека покажа колку е голема таа публика, во секој поглед.“

Годинешното Светско првенство се одржа во САД, Канада и Мексико, што овозможи поповолни временски зони за северноамериканските навивачи во споредба со Светското првенство во 2022 година, кое се играше во Катар. Вкупната гледаност на турнирот на „Фокс“ беше повеќе од двојно поголема во однос на пред четири години.

Во неизвесен натпревар во кој немаше голови во регуларниот дел, Шпанија на крајот ја освои својата втора светска титула, откако ја совлада Аргентина со 1:0 по продолженијата. Натпреварот го одбележа и 11-минутно шоу на полувремето со настапи на Мадона, Шакира, Џастин Бибер и јужнокорејската група БТС.

Целиот турнир, кој траеше 39 дена, оствари голем успех и на социјалните мрежи и на стриминг-платформите. Официјалниот профил на ФИФА на „Тикток“ (TikTok) оствари повеќе од 24,1 милијарда прегледи за време на турнирот, според податоците на платформата. Фокс уан, која беше лансирана пред речиси една година, добила околу 2,8 милиони нови претплатници за време на првенството, што претставува најуспешен месец досега според бројот на нови регистрации, покажуваат податоците на компанијата „Антена“ (Antenna).

Светското првенство беше и значителен извор на приходи од рекламирање за „Фокс“. Телевизијата емитуваше реклами за време на триминутните паузи за хидратација што беа задолжителни на турнирот во 2026 година. Тие паузи, кои се случуваа двапати на секој натпревар, отворија дополнителен простор за рекламирање што би можел да донесе речиси 500 милиони долари приходи за „Фокс“. Таквата сума речиси целосно би ги покрила средствата што, според медиумските извештаи, компанијата ги платила за правата за телевизиски пренос на турнирот.

Овие профитабилни паузи за хидратација би можеле да ѝ помогнат на ФИФА да обезбеди уште повредни договори за следните две Светски првенства. Организацијата веќе почна да ги нуди телевизиските права за Светското првенство во 2030 година, кое ќе го организираат Шпанија, Португалија и Мароко.

„Телемундо“, кој претходно овој месец ги обезбеди американските права за пренос на клупските натпреварувања на Европската фудбалска асоцијација (УЕФА) на шпански јазик, е заинтересиран да го емитува и следното Светско првенство, изјави Конде.

„Секогаш ќе продолжиме да бараме можности што ќе им служат на нашите гледачи, ќе бидат во согласност со нашата долгорочна визија и ќе имаат стратешка и економска оправданост. Затоа ќе ги разгледаме сите такви можности“, рече тој.