Огромен потенцијал на женскиот спорт, пробиена е границата од милијарда долари

Растот на популарноста на женскиот спорт на глобално ниво пластично се искажува со цифра од 1,3 милијарда долари очекуван приход од целиот сектор во 2024 година. Тоа е најмалку 300 проценти повеќе отколку што се проценуваше пред три години и првпат е пробиена магичната граница од милијарда долари годишно.

Структурата на приходите во женскиот спорт значително се разликува од таа во машкиот, каде што доминираат телевизиските права. Овде најзначајна ставка се комерцијалните приходи, кои опфаќаат спонзорства и продажба на производи. На нив отпаѓаат дури 55 проценти од вкупните приходи, ТВ-правата учествуваат со 27 отсто, а приходите од натпреварите обезбедуваат 18 проценти.

 

 

Фудбалот и кошарката очекувано се двата највредни женски спорта, додека последните извештаи го гледаат, верувале или не, крикетот како трет најкомерцијално динамичен спорт.

Географски гледано, главен пазар без сомнеж се Соединетите Американски Држави (САД). Дури 52 процента од приходите во женскиот спорт се генерираат „преку барата“. Европа сериозно заостанува. Вкупните годишни приходи на сите клубови во германската Фрауен-бундеслига (Frauen-Bundesliga), една од најсилните европски фудбалски лиги за жени, не надминуваат 30 милиони долари.

 

 

Клучна е инклузијата

На неодамнешните Олимписки игри во Париз учествуваа еднаков број спортисти и спортистки и тоа е јасна порака. Растот на женскиот спорт се гледа преку заземањето сè повеќе ударни термини на ТВ-програмите, како и преку полнењето сè поголеми стадиони и сали. Ним тоа никој нема да им го даде или да им го отстапи врз основа на позитивна дискриминација, тоа едноставно мора да се освои. Повеќе приходи за женскиот спорт обично значи помалку за другите.

Женскиот спорт е една од најбрзорастечките области во спортската индустрија, се наведува во анализата на „Дилојт“ (Deloitte). Кај развојот на женскиот спорт клучни се инклузијата и ставот на најважните луѓе во поединечните спортови, а потоа и пронаоѓањето интерес кај инвеститорите. Од сите спортски вложувања минатата година, 14 проценти се однесуваат исклучително на женскиот спорт, дополнителни 34 отсто се мешани инвестиции, кои истовремено вклучуваат и машки и женски спорт.

Платни листи 

Погледот на листата на најплатени спортистки става фокус на спортовите што се развиваат паралелно со машките и имаат многу подолга традиција на пример од фудбалот, а тоа пред сè е тенисот. Повторно и тука сè уште се забележува фрапантен финансиски јаз меѓу најплатените спортисти и спортистки. Причините се многукратно подарежливите клупски и спонзорски договори.

 

 

Додека спортските икони како Роналдо и Меси ги привлекуваат глобалните брендови како „Најк“ (Nike) и „Адидас“ (Adidas), тенисерките како Коко Гоф и Ига Швјонтек имаат милионски договори со брендови како што се „Њу баланс“ (New Balance) и „Ролекс“ (Rolex). Спортистките имаат поинаков пристап и во многу други сегменти, па така, милионерката Ема Радукан се најде во фокусот на јавноста поради тоа што вози половен автомобил „дачија сандеро“ (Dacia Sandero).

Меѓу жените доминираат тенисерките, а најплатена е Коко Гоф со 22,7 милиони долари, додека првите три места кај мажите ги заземаат фудбалерот Кристијано Роналдо со 260 милиони долари, голферот Џон Рам со 218 милиони долари и фудбалерот Лионел Меси со 135 милиони долари. Односите меѓу платните листи на спортистите и на спортистките сè уште е несоодветно да се споредуваат.

Emma Raducanu/Bloomberg

Експертите често нагласуваат колку е важно на женскиот спорт сè повеќе да се гледа како на единствен производ што сè повеќе се разликува од елитниот машки спорт.

Идни предизвици

„Дилојт“ очекува дека вредноста на тимовите и на лигите ќе продолжи да расте, а предвидува дека вредноста на неколку тима ќе надмине 100 милиони американски долари. Во развојот на овој дел од спортската индустрија сепак најважна улога има Светското фудбалско првенство за жени, што претставува глобално најзначаен настан за женскиот спорт.

Од друга страна, се очекува дека на женските елитни спортови и натаму ќе им се доделуваат дополнително емитување во ударните термини, со што ќе биде полесно да се пронајдат и гледаат женските натпревари. Телевизиските куќи, стриминг и платформите на социјалните мрежи ќе имаат важна улога во претставувањето на големите случувања што го привлекуваат интересот на новите и на постојните обожаватели, истовремено создавајќи искуство што ќе се помни и ќе остави долгорочни сеќавања и емоции како што се случува со машките спортови.

Следниот чекор ќе биде задржување на постојаните гледачи, кои лојално ги следат своите омилени спортистки, тимови и натпреварувања во текот на сезоната. За да се постигне тоа, спортските организации и медиумите ќе мора да продолжат да го зголемуваат емитувањето на женските спортови во ударните термини, како и вложувањата во дигиталните платформи, кои ги прават натпреварите и турнирите достапни за сите што сакаат да гледаат.