text size
Огромните инвестиции на Саудиска Арабија го враќаат боксот до гламурот и престижот што ги уживаше во време на легендарниот промотор Дон Кинг, изјави висок функционер во една од најголемите боксерски организации.
„Моментално тука се исплаќаат најголемите пари и тоа е така веќе две години“, рече претседателот на Светскиот боксерски совет (ВБЦ - WBC) Маурицио Сулејман во интервју во Ријад. „Како што стојат работите сега, тоа е како кога боксот дојде во Вегас. Тие ја враќаат ерата на Дон Кинг“, рече Сулејман, мислејќи на човекот кој промовираше некои од најголемите имиња во боксот, вклучувајќи ги Мухамед Али и Џорџ Форман.
Под водство на Турки Ал-Шеик, советник на кралскиот двор и претседател на Општата управа за забава, Саудиска Арабија инвестираше милиони долари во организирање натпревари меѓу некои од најголемите боксерски имиња во последните две години. Ова вклучува два меча меѓу Тајсон Фјури и Олександр Усик во 2024 година, чии наградни средства надминаа 100 милиони долари.
Прочитај повеќе
Флојд Мејведер купува над 60 згради во Њујорк
Поранешниот боксер постигна договор за купување на портфолио за пристапни станови за живеење во Њујорк.
19.10.2024
Првиот натпревар - наречен „Огнен прстен“, одржан на раскошен настан во Ријад на кој присуствуваа фудбалската ѕвезда Кристијано Роналдо и раперот Еминем - оствари 1,5 милиони прегледи по пат на услугата „pay-per-view“. Еден од најпознатите натпревари на Кинг беше реванш мечот во 1997 година помеѓу Мајк Тајсон и Евандер Холифилд, кој привлече речиси два милиони гледачи преку преносот со плаќање по преглед.
Потезите на Ријад во светот на боксот се дел од пошироката стратегија за инвестирање во глобалниот спорт под водство на престолонаследникот Мохамед бин Салман, со цел диверзификација на економијата, подобрување на квалитетот на животот на граѓаните, ублажување на имиџот на кралството и привлекување туристи.
Кралството го поддржува формирањето на нова компанија за промоција на боксот во соработка со „ТКО груп холдингс“ (TKO Group Holdings Inc.), која е сопственик на ВВЕ (WWE) и УФЦ (Ultimate Fighting Championship - UFC). Саудиска Арабија, исто така, предизвика потреси и во голфот и фудбалот со трошење големи суми за привлекување на најдобрите играчи и ќе биде домаќин на повеќе големи спортски настани во наредната деценија, а кулминацијата ќе биде Светското првенство во фудбал во 2034 година.
Според зборовите на Сулејман, се размислува за заедничка работа на идните турнири во Саудиска Арабија, партнерство за нови меѓународни настани, како и изградба на музеј на боксот. Тие разговори се уште се во рана фаза и неизвесно е како понатаму ќе се развиваат, додаде тој.
Извршниот директор рече дека се надева оти парите од Саудиска Арабија ќе помогнат да се обедини боксот, „ако сè се канализира правилно“.
Предизвикот, рече тој, е што промотерите на боксот во другите делови на светот нема да можат да парираат со наградните фондови што ги нуди Саудиска Арабија, што значи дека ќе мора да најдат начини да продадат повеќе билети, да соработуваат за да ги зголемат приходите и да бараат дополнителни зделки за емитување преку платформите за стриминг.
За Сулејман клучното прашање е дали Саудиска Арабија може да продолжи да инвестира милиони долари во боксот. Слабите приливи на странски директни инвестиции, ниските цени на нафтата и постојаните дупки во буџетот водат до преоценување на приоритетите во кралството, но претседателот на ВБЦ е оптимист и верува дека инвестициите во неговиот спорт ќе продолжат да течат.
.webp){kind=icon}
