Легендарниот НБА клуб на продажба, проценета вредност од 3,6 милијарди долари

Уште еден НБА тим се најде на пазарот, Портланд Трејлблејзерс e на продажба како дел од наследството на Пол Ален, коосновачот на „Мајкрософт“. Тимот ги ангажираше инвестициската банка „Ален и ко“ и адвокатската фирма „Хоган Ловелс“ да го водат процесот на продажба, соопштија „Трејлблејзерс“ во соопштението.

Ален, кој почина во 2018 година, сакал спортските средства од неговиот имот еден ден да бидат продадени, а приходите од продажбата да бидат насочени во добротворни цели. Неговиот сопственички удел во НФЛ тимот Сиетл Сихокс и 25-процентен удел во фудбалскиот клуб Сиетл Саундерс од МЛС моментално не се на продажба, според истото соопштение.

НБА беше сведок на голем број големи трансакции во последните неколку години. Бостон Селтикс беа продадени во март за рекордни 6,1 милијарда долари. Пред тоа, Далас Маверикс, Феникс Санс и Шарлот Хорнетс ги сменија сопствениците.

Сè уште не е познато по која цена би можеле да бидат продадени Трејлблејзерс. Според процената на „Спортико“, вредноста на клубот е околу 3,6 милијарди долари, што го сместува на 23-то место меѓу 30-те франшизи во НБА.

Продажбата на „Трејлблејзерс“ би можела дополнително да ги забави потенцијалните планови за проширување на НБА, бидејќи лигата можеби ќе сака да види колку ќе заработи еден клуб пред да одреди такси за нови тимови што ќе се приклучат. Ова би можело да го одложи доделувањето франшизи на градови како Лас Вегас и Сиетл.