Инвеститор на Маск станува сопственик на легендарен англиски клуб

АКП (Aliya Capital Partners), инвестициска компанија со седиште во Мајами, ѝ се приклучува на сопственичката група што го презеде 154 години стариот фудбалски клуб Рединг од кинескиот бизнисмен Дај Јонг.

АКП ќе стане значаен инвеститор во Рединг, под услов да добие одобрување од лигата, изјави во петокот Рос Кестин, извршен директор и коосновач на АКП. Кестин ќе му се приклучи на управниот одбор на клубот, кој се натпреварува во третата англиска лига – ЕФЛ (EFL League One).

На почетокот на месецов американскиот финансиер Роб Кохиг и неговата компанија „Редвуд“ (Redwood Holdings) се договорија да го купат Рединг по неколкумесечни преговори. Кохиг го потврди вложувањето на АКП во клубот кога беше прашан од „Блумберг њуз“ (Bloomberg News), додека претставник на Рединг одби да коментира.

„Рединг, со својата 150-годишна традиција и исклучително лојални навивачи, е заспан џин“, рече Кестин. „Сакаме да направиме сè што е потребно за да го разбудиме неговиот неискористен потенцијал и да му помогнеме да се искачи на табелата во ЕФЛ, а еден ден и до слава во Премиерлигата“.

Рединг се соочуваше со финансиски тешкотии во последните години. Дај го презеде клубот во 2017 година, а за време на неговото сопствеништво тимот беше казнет со вкупно 18 бода поради прекршување на финансиските правила, што придонесе за испаѓање во третата лига. Клубот ја заврши сезоната на седмото место, пропуштајќи го пласманот во плејофот за повисок ранг за само една позиција.

Американците сè повеќе инвестираат во фудбал

Американските инвеститори последниве години вложуваат сè повеќе пари во европскиот фудбал, но високите процени ги насочуваат и кон помали лиги, каде што се бараат поатрактивни можности. Холивудските ѕвезди Рајан Рејнолдс и Роб Мекелени го купија велшкиот клуб Верксхем за околу два милиона фунти во 2021 година. Денес вреди околу 100 милиони фунти, според извештај на „Блумберг“ од почетокот на годинава.

АКП е активна во спортските финансии и минатата година го поддржа обидот на американскиот бизнисмен Џон Текстор да го преземе Евертон, кој на крајот го презеде американскиот милијардер Ден Фрајдкин.

Неодамна АКП се договори да го купи израелскиот прволигаш Макаби Нетанја, под услов да добие одобрение, изјави Кестин. Од таму додадоа дека би можеле да ги искористат своите врски во Бразил за да донесат играчи во Обединетото Кралство.

АКП исто така има поддржано многу познати технолошки компании, вклучувајќи ги „Опен еј-ај“ (OpenAI), „Ербиенби“ (Airbnb), „Убер“ (Uber Technologies) и „Спејс екс“ (SpaceX), според информациите на нивната веб-страница. Компанијата наведе дека била посветена на поддршката на преземањето на Твитер од страна на Илон Маск пред три години.

„Маск направи многу добро за светот“, рече Кестин. „Можеби не е политички коректен, но сака да ги направи светот и галаксијата подобро место“.

Во моментов нема коментари за веста. Биди прв да коментира...

Остави коментар