Една година до СП во фудбал: Билетите се тука, ама (сè уште) не се твои

На нешто повеќе од една година до почетокот на Светското првенство во фудбал, навивачите низ светот се наоѓаат во чудна ситуација: можат да купат ВИП-пристап до финалето во Њу Џерси за повеќе од 70.000 долари, но не можат да резервираат основен билет за натпревар од групната фаза во Далас.

Моментално се достапни само пакети за „гостопримство“ (hospitality), кои ФИФА, преку својот партнер „Он локејшн“ (On Location), ги нуди во различни категории. Цените се движат од 5.300 долари за основен пакет во Хјустон до 73.200 долари за осумдневен премиум пакет на стадионот „Мет лајф“ (MetLife), кој го вклучува и финалето.

Алиша Фалкен од „Он локејшн“ објаснува дека „понудата е насочена кон различни профили на потрошувачи, од корпоративни клиенти до страсни навивачи, кои бараат искуство што се случува еднаш во животот. Сепак, аналитичари како Ерик Фишер од „Спортс бизнис журнал“ предупредуваат дека „програмите за гостопримство сè повеќе ги истиснуваат традиционалните навивачи“, претворајќи го најпопуларниот спортски настан во светот во ексклузивен производ.

Чекање за редовни влезници

Тие што немаат десетици илјади долари на располагање мора да почекаат до втората половина на 2025 година, кога ФИФА ќе ги објави таканаречените редовни билети. Точниот датум сè уште не е објавен, но се знае дека системот ќе користи динамичко формирање на цените, што значи дека билетите ќе станат поскапи или поевтини во зависност од интересот за одреден натпревар.

Овој модел веќе е тестиран на други големи настани. Во пресрет на Светското клупско првенство што се одржува во САД, ФИФА во последен момент ги намали цените поради нискиот интерес, додека билетите за Копа Америка 2024 веќе забележаа големи осцилации во првата недела од продажбата.

Според процените на консултантската фирма „Дилојт“, просечната цена на обичен билет за СП 2026 ќе биде околу 305 долари за групната фаза, додека финалето ќе достигне до 1.550 долари во највисоката категорија. За споредба, на Евро 2024, премиум билетите за финалето во Берлин чинеа до 2.000 евра, додека најевтините беа достапни од само 30 евра.

Постои тренд на раст кај цените на билетите

Цените на влезниците во голема мера го одразуваат трендот на раст на спортската потрошувачка. Пазарот на спортско угостителство моментално вреди повеќе од 17 милијарди долари и расте со стапка од речиси 20 проценти годишно. Експертот за спортски маркетинг Марк Конрад вели дека „навивачите повеќе не сакаат само да го гледаат натпреварот - тие сакаат искуство. А тоа си има цена“.

Секундарниот пазар дополнително ја комплицира ситуацијата. Веќе се појавуваат шпекулативни понуди за финалето на Светското првенство на платформи како „Вивид ситс“ (Vivid Seats) за цени над 2.500 долари, иако ФИФА предупредува дека ваквите продажби не се овластени и би можеле да резултираат со откажување билети.

Скот Блексли, главен оперативен директор на „Он локејшн“, за АП изјави дека „интересот за гостопримство ги надминува сите очекувања. Навивачите сакаат безбедност и пристап, а овие пакети го гарантираат тоа“. Истовремено, поранешниот портпарол на ФИФА, Гвидо Тоњони, предупредува дека „постои опасност Светското првенство да ја изгуби својата душа ако сè стане прашање на пристап до ексклузивни области наместо на заедничко навивачко искуство“.

Како до влезници?

Па, кое е решението за просечниот навивач? Првиот чекор е да се регистрирате на официјалната интернет-страница на ФИФА (FIFA.com) за да добивате известувања кога ќе започнат редовните продажби. Второ, важно е да се испланира буџет во опсег од 300 до 1.500 долари по натпревар, во зависност од фазата на турнирот. Трето, се препорачува да се избегнувате сомнителни препродавачи и да се фокусирате на проверени извори.

На крајот на краиштата, иако ФИФА промовира инклузивност и глобален дух на играта, сегашниот модел на дистрибуција на влезници очигледно ги фаворизира посолвентните купувачи. Една година пред отворањето, Светското првенство во 2026 година повеќе личи на елитен бизнис-самит отколку на фестивал на светскиот фудбал.

Како ќе реагира публиката кога ќе се отворат вратите за редовна продажба и дали ФИФА ќе ја приспособи својата стратегија под притисок на јавноста, останува да се види. Засега, фактот е јасен: најпосакуваниот билет на планетата постои - но сè уште е надвор од дофат на мнозинството фудбалски навивачи.