Трансферот на Лука Дончиќ во Лос Анџелес Лејкерс на почетокот на 2025 година ја потресе НБА-лигата, но клучните одлуки за неговата иднина сè уште треба да се донесат. Навивачите трпеливо ја чекаат неговата одлука за продолжување на договорот, а во игра се неколку опции.
Словенечкиот интернационалец не може официјално да потпише нов договор пред 2 август, бидејќи тогаш истекуваат шест месеци од неговиот трансфер во Лејкерс. Според ЕСПН (ESPN), Дончиќ би можел да потпише четиригодишен договор вреден дури 229 милиони долари. Втората опција е двегодишен договор, што би му дало право на максимален петгодишен договор во 2028 година.
Друга опција е тригодишен договор вреден 165 милиони долари, каде што третата година би била со опција за играч. Според анализите на ЕСПН и „Атлон спортс“ (Athlon Sports), овој вид договор би му дал на кошаркарот најголема флексибилност. Доколку во 2028 година влезе на пазарот за слободни играчи, би можел да потпише десетгодишен супермакс договор вреден до 296 милиони долари.
Дончиќ не е единствениот од регионот со договори вредни повеќе милиони долари. Никола Јокиќ, кој игра за Денвер Нагетс, има договор вреден 276 милиони долари, со важност до 2028 година и можност за тригодишно продолжување, и тоа уште годинава, за 212 милиони долари. Никола Вучевиќ (Чикаго Булс) има тригодишен договор вреден 60 милиони долари до 2026 година. Богдан Богдановиќ (Лос Анџелес Клиперс) исто така игра во НБА, а српскиот играч има договор вреден 16 милиони долари.
Моментално, според податоците на „Спотрак“ (Spotrac.com), највредниот договор во НБА го има Џејсон Тејтум (Бостон Селтикс), вреден околу 314 милиони долари. На второто место е Џејлен Браун (Бостон Селтикс) со договор вреден нешто над 285 милиони долари. На третото место е Никола Јокиќ, чиј договор е вреден 276 милиони долари, додека на четвртото место се Кејд Канингем (Детроит Пистонс) и Еван Мобли (Кливленд Кавалирс), со договор од 269 милиони долари. На петтото место е Бредли Бил (Финикс Санс), чиј договор е вреден 251 милион долари. Доколку Дончиќ одлучи да потпише договор вреден 229 милиони долари, тоа би го сместило меѓу 10-те најплатени кошаркари.
Лејкерс продадени за 10 милијарди долари
Лос Анџелес Лејкерс неодамна беа продадени за неверојатни 10 милијарди долари. Семејството Бас се согласи да му продаде мнозински удел на сопственикот и извршен директор на Лос Анџелес Доџерс, Марк Волтер.
Според „Блумберг“, цената далеку го надминува претходниот рекорд во професионалниот спорт, кој беше поставен во март со продажбата на Селтикс за 6,1 милијарди долари, кога тимот го купи група предводена од Бил Чизхолм. Пред тоа, Вашингтон Командерс од НФЛ беа продадени на група предводена од коосновачот на „Аполо менаџмент“ (Apollo Management), Џош Харисон, за 6,05 милијарди долари.
Волтер првично купи удел во Лејкерс во 2021 година. Како дел од договорот, тој обезбеди превентивно право да купи мнозински удел во тимот доколку некогаш биде ставен на продажба. Според индексот на милијардери на „Блумберг“, Волтер вреди 12,5 милијарди долари. Тој е исто така сопственик на женскиот НБА-тим Лос Анџелес Спаркс, новоформираниот тим Кадилак Формула 1 и женската професионална хокеарска лига.
STA
Семејството Бас ги купи Лејкерс во 1979 година за 67,5 милиони долари. Џини Бас, која го водеше тимот по смртта на нејзиниот татко Џери Бас во 2013 година, ќе продолжи да ја врши таа функција.
Дончиќ верува во проектот
Промената на сопственоста носи стабилност, а Дончиќ покажа дека верува во проектот. По веста за продажбата, познатиот кошаркар се огласи на социјалната мрежа X.
„Лејкерс се одлична организација. Едвај чекам да го запознаам Марк и возбуден сум за иднината. Благодарен сум на Џини и семејството Бас што ме пречекаа во Лос Анџелес и за нејзината континуирана инволвираност во работата со франшизата. Среќен сум што работиме заедно и се надевам на шампионска титула“, напиша Дончиќ.
За потсетување, Дончиќ се пресели од Далас Маверикс во Лос Анџелес Лејкерс во февруари годинава. Дончиќ отиде во Далас во 2018 година од Реал Мадрид, како трет избор на драфтот, и потпиша стандарден четиригодишен договор за почетник вреден вкупно околу 31 милион долари. Неговата годишна плата во последната година се зголеми од околу 6,5 милиони долари, на над 10 милиони долари. Во август 2021 година Дончиќ потпиша петгодишно продолжување на договорот за почетник во вредност од 207 милиони долари, најмногу во историјата на НБА.
.webp){kind=icon}
Во моментов нема коментари за веста. Биди прв да коментира...