Премиерлигата на удар поради случајот со Манчестер сити

Финансиските обвиненија против фудбалскиот клуб Манчестер сити го свртеа вниманието од она што се случува на теренот, изјави извршниот директор на Премиерлигата.

„Луѓето сакаат да гледаат фудбал, а кога сè почнува да се врти околу финансиските прашања, многумина почнуваат да мислат дека нешто не е во ред“, рече Ричард Мастерс во интервју за телевизијата „Блумберг“. „Го разбирам тоа, но и покрај сè, натпреварувањето останува силно“.

Темата за обвиненијата против Манчестер сити предизвика поделби меѓу навивачите. Независна комисија наскоро треба да донесе одлука по дури 115 точки од обвинението, кои се однесуваат на наводни прекршувања на финансиските правила на Премиерлигата. Обвиненијата се резултат на четиригодишна истрага и беа поднесени до комисијата во февруари 2023 година.

Ако клубот биде прогласен за виновен, може да се соочи со парични казни, одземање на освоени титули, па дури и исфрлање од елитното натпреварување. Манчестер сити ги отфрла сите обвиненија и тврди дека не сторил ништо погрешно.

Во изминатите две децении Премиерлигата стана еден од најважните британски извозни производи, во време кога политичкото влијание на земјата опаѓа. Лигата остварува милијарди фунти приходи од телевизиски права, а клубови како Ливерпул и Манчестер јунајтед се познати низ светот. Успехот на лигата привлече многу странски инвеститори, особено од САД, кои денес поседуваат значителен број клубови.

Раководството на лигата моментално се наоѓа во САД како дел од летната турнеја, за време на која Манчестер јунајтед, Вест хем, Евертон и Борнмут играат пријателски натпревари. Сите четири клуба имаат американски сопственици.

Мастерс исто така предупреди дека оптоварувањето на врвните играчи „одамна ја надмина границата на издржливост“.

„Моја работа е да се грижам за Премиерлигата“, рече тој. „Сакам луѓето да уживаат во фудбалот. Сакам најдобрите играчи да бидат на теренот, а не постојано да размислуваат како да ги усогласат сите обврски“.

САД неодамна беа домаќин на значително проширеното Светско клупско првенство на ФИФА, кое наиде на остри критики затоа што дополнително ги оптовари играчите по напорната сезона.

Во јуни, во интервју за германскиот весник „Ди велт“, поранешниот тренер на Ливерпул, Јирген Клоп, ја опиша годинешната верзија на турнирот како „најлоша идеја во историјата на спортот“.

„Не зборувам само како директор на Премиерлигата туку и како претседател на Светската лига“, рече Мастерс. „Потребно е сериозно да се разговара за рамнотежата помеѓу натпреварувањето и грижата за играчите. Ако се воведуваат нови натпреварувања, тогаш мора да се намали бројот на натпревари“.