Ретко кој толку длабоко ги споил модата и спортот, не само како спонзор туку и како архитект на визуелниот идентитет на натпреварувања, клубови и спортисти, како Џорџо Армани, италијанскиот моден гуру што нè напушти во четвртокот.
Во кошарката отиде најдалеку. Од 2008 година беше сопственик и претседател на Олимпија Милано. Клубот под негово водство го стабилизира буџетот, се врати во европската елита и денес го носи неговото име (EA7 Emporio Armani Milano). Со тоа Армани покажа дека дизајнот и управувањето со клуб можат да дишат со ист ритам, дека естетиката е исто толку важна колку и резултатот.
EA7, спортската линија што ја создаде во 2004 година, стана главен мост кон врвниот спорт. Преку неа ги облекуваше италијанските олимписки и параолимписки тимови на Игрите во Лондон, Рио, Токио и Париз – од свечени униформи до облека за тренинг. Со тоа изгради „национален изглед“, кој ја пренесуваше сликата на современа Италија – чисти линии, функционалност, самодоверба.
Прочитај повеќе
Џорџо Армани беше последниот голем господин на модата
Џорџо Армани, титан на светската мода и олицетворение на елеганцијата, остави зад себе не само империја вредна милијарди, туку и наследство на последeн вистински господин на модата кој засекогаш го промени начинот на кој се облекуваме на работа.
08.09.2025
Фудбалот доби и свечена и техничка димензија. „Емпорио Армани“ (Emporio Armani) ја облекува италијанската репрезентација за протоколарни настани, додека EA7 од 2021 година е технички спонзор на Наполи – редок случај каде што луксузен моден бренд ги презема дресовите на еден толку голем клуб.
Во Ф1, во 2021 година беше склучена соработка со Ферари. Армани го облекува тимот за обврските надвор од трките, додавајќи ѝ доза миланска елеганција на црвената боја. Така, овој викенд во неговата Монца, на Големата награда на Италија, му беше оддадена почит на големиот Џорџо.
Во тенисот, EA7 се поврза со ATП-финалето во Торино преку облека за службениот персонал и видливост на најголемата затворена сцена на сезоната.
Армани ја разбираше и моќта на иконите. Кампањите со Дејвид Бекам и Кристијано Роналдо ја спуштија естетиката за високата мода во поп-културата и меѓу масовната публика. Дури и бројот 7 во EA7 стана симбол на атлетска енергија, често поврзуван со пријателството со Андриј Шевченко, легендарната седумка на Милан.
Како што некој напиша во епитафите, Армани не беше „мода од страна“, туку креатор на стандарди за тоа како изгледа спортот надвор од теренот. Од спортски сали до олимписки патеки, од Наполи до Ферари, Армани му подари на спортот униформа на самодоверба. И токму таа синергија на перформанс и стил останува неговиот најтраен белег.
.webp){kind=icon}
