Нарушени односите меѓу „Епл“ и „Опен еј-ај“, можна правна борба

Двегодишното партнерство на „Епл“ (Apple Inc) со „Опен еј-ај“ (OpenAI) стана затегнато, бидејќи стартапот за вештачка интелигенција не ги виде очекуваните придобивки од договорот и сега подготвува евентуални правни мерки.

Адвокатите на „Опен еј-ај“ активно работат со надворешна адвокатска фирма на низа опции што би можеле формално да се спроведат во блиска иднина, рекоа луѓето, кои побараа да не бидат именувани бидејќи разговорите се приватни.

Тоа би можело да вклучува испраќање известување до производителот на „ајфон“со наводна повреда на договорот без нужно да се поднесе целосна тужба на самиот почеток, според луѓето. „Опен еј-ај“ ја ангажирала надворешната фирма во последните денови за да помогне во ситуацијата.

„Опен еј-ај“ веруваше дека партнерството на компаниите, кое го вметна ЧетГПТ во софтверот на „Епл“, ќе намами повеќе корисници да се претплатат на четботот. Исто така, се очекува подлабока интеграција низ повеќе апликации на „Епл“ и првокласно поставување во рамките на асистентот Сири.

Наместо тоа, употребата на технологијата на „Опен еј-ај“ од страна на „Епл“ низ неговите оперативни системи останува ограничена, а функциите може тешко да се најдат.

„Сè направивме од перспектива на производот“, рече извршен директор на „Опен еј-ај“ кој побара да не биде именуван. „Тие не го направија тоа, а уште полошо, дури и не направија искрен напор.“

Портпаролите на двете компании одбија да коментираат.

„Епл“ имаше свои загрижености во врска со „Опен еј-ај“, вклучително и дали компанијата прави доволно за да ја заштити приватноста на корисниците. А неодамнешниот притисок од страна на стартапот за производство на уреди - напор надгледуван од поранешни директори на „Епл“ - го вознемири производителот на „ајфон“.

Секаков правен потег од страна на „Опен еј-ај“ веројатно нема да дојде до завршувањето на судењето со Илон Маск, според луѓето. Не се донесени конечни одлуки, а „Опен еј-ај“ сè уште се надева дека ќе ги реши своите проблеми со „Епл“ надвор од судот.

Тоа е изненадувачки раскол за две компании од Силициумската долина кои некогаш изгледаа подготвени за широка стратешка врска. Во јуни 2024 година, главниот извршен директор на „Опен еј-ај“, Сем Алтман, седеше во публиката на кампусот на „Епл“ кога беше објавен договорот - а шефот за софтвер, Крег Федериги, се осврна на стартапот како „пионер и лидер на пазарот“ во вештачката интелигенција.

Договорот им овозможи на корисниците пристап до резултатите од ЧетГПТ во рамките на Сири и да ја користат технологијата на вештачката интелигенција за да генерираат текст и да анализираат околни објекти преку функцијата за визуелна интелигенција на „ајфон“. Партнерството подоцна се прошири, при што „Епл“ го додаде ЧетГПТ како опција за креирање слики во својата апликација Имиџ Плејграунд (Image Playground) и за анализа на содржината на екранот.

Како дел од договорот, корисниците на „ајфон“ добија начин да се регистрираат за членство во ЧетГПТ директно од менито за поставки на ИОС - при што „Епл“ зема дел од приходите од претплатата генерирани преку своите платформи.

Раководителите на „Опен еј-ај“ веруваа дека договорот на крајот би можел да стане голем приход бидејќи компанијата работеше кон почетна јавна понуда. Наместо тоа, односот се влоши, според луѓето, а обидите на „Опен еј-ај“ за повторно преговарање на договорот се заглавени.

Клиентите на „Епл“ се во огромна мера посклони да се свртат кон самостојната апликација ЧетГПТ отколку да пристапат до технологијата на „Опен еј-ај“ преку Сири и други услуги на „Епл“, според студиите на корисниците спроведени од стартапот за вештачка интелигенција, кои беа опишани од луѓе запознаени со материјата.

Начинот на кој „Епл“ ја дизајнираше интеграцијата значи дека корисниците честопати треба конкретно да го повикаат зборот ЧетГПТ кога зборуваат или пишуваат команда во Сири за да добијат резултати од „Опен еј-ај“. Одговорите се исто така поограничени од оние достапни преку самостојната апликација на „Опен еј-ај“. Тие се појавуваат во мал прозорец, со ограничени информации.

Покрај тоа, раководителите на „Опен еј-ај“ веруваат дека „Епл“ не ја промовирала доволно интеграцијата низ екосистемот на „ајфон“, „ајпад“ и „мек“.

„Опен еј-ај“ првично веруваше дека договорот може да генерира милијарди долари годишно во претплати - нешто што не се случило ни приближно. Сега исто така верува дека имплементацијата на „Епл“ му наштетила на брендот на „Опен еј-ај“ кај клиентите.

„Кога слушнавме за оваа можност, звучеше неверојатно: можноста да се стекне огромен број клиенти и да се има дистрибуција во толку голем мобилен екосистем“, рече извршниот директор на „Опен еј-ај“. Сепак, во тоа време, „Епл“ не беше спремен да сподели точно што ќе биде производот, рече лицето.

„Тие во основа рекоа: ‚Опен еј-ај‘ треба да направи скок на верата и да ни верува“, рече извршниот директор, додавајќи дека договорот завршил како неуспех за стартапот.

Во наредните месеци, „Опен еј-ај“ е на работ да ја изгуби својата единствена улога во софтверот на „Епл“. Производителот на „ајфон“ ги отвора своите платформи за мноштво конкурентски добавувачи подоцна оваа година, објави „Блумберг њјуз“.

Тоа значи дека клиентите ќе можат да инсталираат голем број чет-ботови со вештачка интелигенција од „Еп стор“ (App Store) и да ги користат за да одговараат на прашања во Сири или да ракуваат со слики и текст.

„Епл“ тестира интеграции со Клод на „Антропик“ (Anthropic PBC) и Гугл Џемини како дел од овој поттик. Обновениот Сири со оваа можност - дел од оперативниот систем ИОС 27 - е закажан да биде претставен на Светската конференција за развивачи на „Епл“ на 8 јуни.

Од 2024 година, Клод и Џемини станаа посилни конкуренти на ЧетГПТ. „Антропик“е во рани разговори за собирање пари со проценка од повеќе од 900 милијарди долари, објави „Блумберг њјуз“оваа недела, потег што го нагласува брзиот раст на компанијата.

Извршниот директор на „Опен еј-ај“ рече дека прифаќањето на „Епл“ од други даватели на вештачка интелигенција не ја поттикнува правната постапка на компанијата бидејќи партнерството не било наменето да биде ексклузивно од самиот почеток.

И новиот систем за интеграција во ИОС 27, познат како Екстенжнс (Extensions), всушност може подобро да го промовира ЧетГПТ - дури и со зголемената конкуренција. Во новиот системски интерфејс за пребарување, на корисниците ќе им биде претставен избор на модели со вештачка интелигенција, кој би вклучувал и Сири и надворешни алтернативи како што е понудата на „Опен-еј-ај“.

За време на првичните дискусии за договор во 2024 година, „Епл“ го окарактеризира договорот како можност на исто ниво со договорот со Гугл за пребарување во прелистувачот Сафари, според луѓе запознаени со разговорите. Тоа партнерство носи десетици милијарди долари приходи за двете страни годишно.

Интеграцијата на ЧетГПТ е одвоена од обидот за обновување на основните модели со вештачка интелигенција на „Епл“ со технологија од тимот Џемини на Гугл. Епл го склучи тој договор кон крајот на минатата година откако претходно разгледа поширок договор со „Опен еј-ај“.

„Опен еј-ај“ не беше заинтересиран да работи со „Епл“ на новите модели бидејќи се чувствуваше изгорен од почетната врска, според луѓето. „‚Епл‘ има толку голема пазарна моќ што може да диктира услови“, рече извршниот директор. „Веќе го направивме овој скок на доверба со вас, и не функционираше добро.“

„Епл“ му плаќа на Гугл околу милијарда долари годишно за да ја користи својата технологија за вештачка интелигенција, објави „Блумберг“ минатата година. Извршниот директор Тим Кук изјави во февруари дека „Епл“ се поврзал со компанијата затоа што верува дека „технологијата за вештачка интелигенција на Гугл ќе обезбеди најспособна основа“ за нејзините напори за вештачка интелигенција.

Во исто време, „Опен еј-ај“ се појави како потенцијален конкурент на „Епл“ во хардверот. Минатата година, компанијата за вештачка интелигенција купи стартап за уреди од следната генерација, ко-основан од поранешниот шеф за дизајн на „Епл“, Џони Ив, создавајќи нов извор на тензии. Тој бизнис, управуван од поранешните директори на „Епл“, Танг Тан и Еванс Ханки, сега работи на создавање алтернатива на „ајфон“ и другите уреди.

Извршните директори на „Епл“ се бесни повеќе од една година поради начинот на кој „Опен еј-ај“ регрутираше инженери од својот тим за хардвер, објави „Блумберг њуз“. За да привлече таленти, компанијата за вештачка интелигенција понуди пакети базирани на акции вредни милиони долари повеќе отколку што нуди „Епл“.

Дури и во 2024 година, „Епл“ имаше посебни загрижености во врска со стандардите за приватност на ЧетГПТ. Но, компанијата сметаше дека нема друг избор освен да ја интегрира технологијата, знаејќи дека нејзините внатрешни генеративни функции на вештачката интелигенција сè уште се далеку од готови, според луѓе запознаени со одлуката.

Борбите на „Епл“ да ја испорача технологијата на вештачка интелигенција на време станаа црно око за компанијата. Порано овој месец, „Епл“ реши колективна тужба од 250 милиони долари во која се тврди дека се вмешала во лажно рекламирање за своите нови функции на Сири. Дел од таа технологија, пласирана на пазарот на потрошувачите во 2024 година, сè уште не е излезена на пазарот.