„Гугл“ како гарант зад зделката за чипови на „Антропик“ од 35 милијарди долари

„Гугл“ беше меѓу првите инвеститори во „Антропик“ (Anthropic PBC), купувајќи удели во компанијата за вештачка интелигенција во повеќе наврати. Сега сѐ почесто обезбедува гаранции за финансирањето врз кое се потпираат центрите за податоци на стартап-компанијата, нагласувајќи ги сложените деловни врски меѓу неколкуте најголеми технолошки компании што вложуваат огромни средства во ВИ.

„Антропик“, креаторот на Клод, изнајмува моќни компјутерски чипови во пет центри за податоци со поддршка од одамна етаблираниот технолошки гигант. „Гугл“, чии ВИ-производи го вклучуваат и Џемини, се согласи да гарантира за плаќањето на закупот на секоја локација, помагајќи му на „Антропик“ да обезбеди финансирање што практично претставува заем од 35 милијарди долари. Учеството на „Антропик“ во овие центри за податоци како дел од ова огромно финансирање досега не било јавно објавено.

Во трката на Силициумската Долина за изградба на ВИ-инфраструктура, водечките компании склучуваат сложени и често меѓусебно испреплетени договори за да обезбедат пристап до потребните ресурси. Иако „Гугл“ го користи својот моќен биланс на состојба за финансирање центри за податоци, поддршката не му користи само на „Антропик“. Компанијата е и снабдувач на чиповите што „Антропик“ на крајот ќе ги користи во тие центри. Така, „Гугл“ добива можност да му продаде повеќе хардвер на клиент чии производи се сметаат за двигател на голем дел од иднината на ВИ-индустријата.

Во најновата зделка учествува и дизајнерот на чипови „Бродком“ (Broadcom Inc.), кој ги искористи своето влијание и високите кредитни рејтинзи за да помогне во обезбедувањето финансирање што ќе му овозможи на „Гугл“ да испорача тензорски процесорски единици, односно ТПУ-чипови, на развивачот на ВИ-модели „Антропик“. Двете компании и претходно соработувале. „Гугл“ и „Антропик“ во 2025 година склучија долгорочно партнерство за ТПУ-чипови, а пред два месеца „Гугл“ се согласи да инвестира 10 милијарди долари во стартапот.

Поврзување на технолошките гиганти

Речиси секој ден на виделина излегуваат нови договори што ги поврзуваат најголемите технолошки компании. „Спејс екс“ (SpaceX) кон крајот на минатата недела соопшти дека „Гугл“ се согласил да му плаќа по 920 милиони долари месечно од октомври 2026 до јуни 2029 година за обезбедување компјутерски капацитети.

„Пред една година некои се прашуваа дали воопшто ќе има доволно побарувачка за да ги оправда сите овие инвестиции во инфраструктура“, изјави Џо Ален од „Брајт Медоу“ (Bright Meadow). 

„Всушност, обемот на достапната инфраструктура и понатаму е ограничувачки фактор, а компаниите вложуваат огромни напори за да обезбедат пристап до неа“, рече тој, без конкретно да ја коментира поврзаноста меѓу „Гугл“ и „Антропик“.

„Антропик“ одби да даде коментар. Претставниците на „Бродком“ и на матичната компанија на „Гугл“, „Алфабет“ (Alphabet Inc.), не одговорија на барањата за коментар.

Не е невообичаено големи компании од иста индустрија да соработуваат меѓусебно. Сепак, концентрацијата во ВИ-индустријата привлекува сѐ поголемо внимание. Некои претходни договори предизвикаа загриженост поради меѓусебната зависност на компаниите, односно можноста тие да се потпираат една на друга до степен што евентуалните проблеми кај една компанија би можеле да се прелеат врз партнерите и дополнително да ја зголемат штетата. Во 2024 година Федералната трговска комисија на САД поведе истрага за да ги „испита корпоративните партнерства и инвестиции поврзани со давателите на ВИ-услуги“.

Bloomberg

Во новата зделка за микрочипови вредна 35 милијарди долари, „Бродком“ ги дизајнира чиповите, „Гугл“ ги развива, а „Антропик“ ќе ги користи во пет центри за податоци во САД. Финансирањето го обезбедуваат „Аполо“ (Apollo Global Management Inc.) и „Блекстоун“ (Blackstone Inc.).

„Теравулф“ (TeraWulf Inc.), компанија што од рударење криптовалути се пренасочи кон оператор на центри за податоци, развива два од објектите - еден во комплексот Лејк Маринер во близината на Бафало, во државата Њујорк, и друг во Абернати, Тексас, велат извори запознаени со случајот, кои побарале анонимност бидејќи станува збор за информации што не се јавни.

„Сајфер“ (Cipher Digital Inc.) развива објект во близината на Колорадо Сити во Тексас, „Хат 8“ (Hut 8 Corp.) подготвува центар за податоци во Сент Франсисвил, Луизијана, а заедничко вложување на „Некст фронтиер“ (Next Frontier) и „Флуидстак“ (Fluidstack) развива објект во округот Саливан, Индијана.

Во серија договори во изминатите девет месеци овие компании обезбедија повеќе од 15 милијарди долари преку издавање обврзници за финансирање на изградбата на центрите за податоци. Сите тие вклучуваат договор за закуп со облачната ВИ-платформа „Флуидстак“.

Секоја од овие зделки вклучува таканаречена гаранција од „Гугл“. Според овој механизам, „Гугл“ ќе ги обесштети сопствениците на обврзниците доколку „Флуидстак“ не ги исполни своите обврски или банкротира. Поддршката ќе стапи во сила дури откако центрите за податоци ќе почнат со работа и „Флуидстак“ официјално ќе го започне нивниот закуп.

„Антропик“ има клучен договор со „Флуидстак“, кој ги поврзува сите овие зделки. Во ноември минатата година компанијата објави инвестиција од 50 милијарди долари во компјутерска инфраструктура во САД. Тогаш откри дека работи со „Флуидстак“ на изградба на специјално дизајнирани центри за податоци за развивачот на Клод.

„На пазарот на должнички инструменти со кредитен рејтинг под инвестициско ниво, ние практично ги финансираме целата неопходна опрема и инфраструктура“, изјави Џон Јовановиќ, кораководител на секторот за финансирање со задолжување во „Метлајф“ (MetLife Investment Management).

„Но овие зделки се многу едноставни и кај повеќето издавачи ние суштински го преземаме кредитниот ризик на компаниите од групата величествени седум.“

Bloomberg

Не е невообичаено технолошките компании со највисок кредитен квалитет да обезбедуваат финансиска поддршка за да се реализираат зделките. Договорите за ВИ-инфраструктура често вклучуваат стартапи и други компании што ги прават финансиерите претпазливи, па поддршката од голем технолошки партнер може значително да ги намали нивните стравувања.

Говорејќи на Глобалниот кредитен форум на „Блумберг“, Кристина Минис, глобален раководител на групата за потекло на алтернативни инвестиции во „Голдман Сакс груп“ (Goldman Sachs Group Inc.), предупреди дека постои ризик мал број компании да ја концентрираат ВИ-инфраструктурата во свои раце.

Но таа додаде дека во нивниот процес на разгледување зделки сѐ почесто се појавуваат и помали компании за кои претходно никогаш не слушнала.

„Да, постои одредена концентрација. Но таа се шири низ економијата на начин што, според мене, е конструктивен“, рече Минис.

„Бројот на компании со кои сега се обидуваме да воспоставиме деловни односи е навистина извонреден.“