Финк од „Блекрок“: Ако забавиме со развој на ВИ, технологијата ќе стане домен само на големите фирми

Одложувањата во развојот на вештачката интелигенција поради противењето на јавноста ќе ја претворат оваа технологија во „домен на големите компании“, ограничувајќи го пристапот до неа – предупреди Лари Финк, извршен директор на „Блекрок“ (BlackRock Inc.), најголемата инвестициска компанија во светот.

„Колку побрзо изградиме поголеми капацитети, толку повеќе ќе можеме да ја демократизираме технологијата и да ја направиме достапна за сите“, изјави Финк за време на панел-дискусијата на Канадскиот инвестициски самит, одржан во Торонто.

Овие изјави доаѓаат во момент кога водечките компании за вештачка интелигенција работат на меѓусебна координација, како и на соработка со американската влада, околу безбедносните мерки за оваа технологија. Дарио Амодеи од компанијата „Антропик“ во саботата повика водечките креатори на напредни модели „доброволно да соработуваат за да постават стандарди“ за вештачката интелигенција и да го забават нејзиниот напредок, со цел да се намали ризикот од катастрофални последици.

Во меѓувреме, противењето на јавноста кон изградбата на центри за податоци им создава главоболки на инвеститорите и станува важно прашање во некои од трките за среднорочните избори во САД, вклучително и за клучна позиција во Сенатот што се избира во Охајо.

На конференцијата канадскиот премиер Марк Карни покани некои од најголемите светски инвеститори, настојувајќи да ја промени повеќегодишната состојба на слаби деловни инвестиции во земјата и да ја намали економската зависност на Канада од САД.

Со реформите во канадските даночни и регулаторни политики, „потенцијалните стапки на раст овде се многу повисоки отколку што повеќето луѓе би очекувале“, изјави Џон Греј, претседател на „Блекстоун“ (Blackstone Inc.), на истиот панел. „Од економска гледна точка, Канада е ’заспан џин’“.

На истиот панел со Финк, Дилхан Пилај, извршен директор на „Темасек Холдингс“ (Temasek Holdings Pte), истакна дека неговата компанија почнала да инвестира во канадски компании поврзани со вештачката интелигенција уште во 2016 година.

Сепак, „проблемот со тие бизниси е што, доколку немаме капитал за нивно проширување, тие се селат во САД. Тоа е најголемиот предизвик со кој се соочуваме“, рече Пилај.