Што ги чека македонските компании: Колкав поврат има инвестицијата во вештачка интелигенција

Приходите на компаниите што се лидери во употребата на вештачката интелигенција се за 7,2 пати повисоки од приходите на другите компании. Ова го покажува истражувањето на „Прајсвотерхаускуперс“ (PwC) спроведено меѓу 1.217 компании на глобално ниво.

Само 20 отсто од сите компании вклучени во ова истражување остваруваат дури 74 отсто од приносите што се поттикнати од вештачката интелигенција. Која е причината за ваквата доминација? Во истражувањето се наведува дека подобрата подготвеност за ВИ подобрува широк спектар на посредни резултати во работењето, кои потоа влијаат врз финансиските резултати.

Компаниите лидери во употреба на вештачката интелигенција пријавуваат дека употребата на ВИ-алатки го забрзува лансирањето нови производи и услуги. Тие исто така велат дека ВИ помага во трансформирањето на нивните деловни и оперативни модели, го подобрува квалитетот на носењето одлуки и ги унапредува корисничкото искуство и довербата.

„Кога компаниите со силни основи ја зголемуваат употребата на ВИ, тие забележуваат речиси двојно поголемо подобрување на перформансите во споредба со оние што имаат послаби основи. Посилните податоци и платформи го намалуваат времето потребно за воведување, додека редизајнирањето на работните процеси и градењето доверба кај работната сила го зголемуваат прифаќањето. Поголемото прифаќање, пак, генерира побогати податоци и повратни информации, подобрувајќи го системот со текот на времето и зголемувајќи го влијанието со секое воведување“, се наведува во истражувањето.

Ефикасноста не е доволна, иновациите се во фокусот

Многу компании ја користат ВИ за да ја зголемат ефикасноста. На пример, осигурителните компании со ВИ-решенија побрзо ги обработуваат барањата за надомест, или производителите на софтвер со помош на ВИ побрзо доаѓаат до нов код.

Но лидерите во употребата на ВИ не застануваат само на ефикасноста. Тие ја користат за иновативни решенија, за преобликување на деловните модели што потоа ќе им помогне во освојување нови пазари. 

Студијата покажува дека водечките компании имаат за 2,6 пати поголема веројатност од другите да дојдат до нови, иновативни решенија.

ВИ е трагачот по нови можности, па оттука лидерите имаат 1,8 пати поголема веројатност од другите компании да идентификуваат нови извори на вредност

Лидерите во ВИ имаат два-три пати поголема веројатност од другите за соработка со компании од други сектори, да отклучуваат вредност преку работење во деловни екосистеми и да се натпреваруваат надвор од своите вообичаени сектори.

Дисциплина е неопходна

Водечките компании во истражувањето ги зајакнуваат своите агенди за раст засновани на ВИ со дисциплинирано управување.

„Тие рано носат стратешки одлуки и ги операционализираат тие одлуки преку јасна одговорност и мерење. Во споредба со другите, водечките компании почесто имаат приоритетен патоказ за ВИ за краткорочни и долгорочни периоди, ја усогласуваат визијата за ВИ со деловните цели, систематски го следат влијанието врз бизнисот и ги сметаат високите раководители директно одговорни за резултатите од ВИ“, наведуваат од „Прајсвотерхаускуперс“.

Повеќе инвестиции во ВИ

Водечките компании вклучени во истражувањето инвестираат 2.5 пати повеќе од своите приходи во ВИ во споредба со другите компании.

Најмногу одвојуваат компаниите од секторите за софтвер, банкарство и медиуми и забава. Тие пријавуваат дека во ВИ инвестираат околу 5 отсто од годишните приходи.

Сепак, значителното инвестирање во ВИ е само дел од формулата на лидерите. Овие компании исто така настојуваат нивните инвестиции да останат усогласени со нивните деловни потреби.

„Според нашето истражување, тие имаат 1,3 пати поголема веројатност од другите компании да ги пренасочуваат финансиските и човечките ресурси кон проекти за ВИ со висока вредност, во согласност со промените на нивните деловни приоритети. Тој пристап е во согласност со голем број истражувања што го поврзуваат динамичното распределување на ресурсите со подобри финансиски резултати“, се наведува во анализата.

Лидерите во ВИ имаат 1,5 пати поголема веројатност од другите компании да обезбедат технолошка инфраструктура дизајнирана специјално за поддршка на експериментирањето со ВИ. Тие често назначуваат лица одговорни за иновации што ги насочуваат проектите за ВИ во рамките на деловните единици. Таа комбинација ги олеснува започнувањето пилот-проекти и нивното брзо и безбедно спроведување.

Вработените мора да имаат доверба во ВИ

Довербата на вработените во технологијата е многу повеќе од ставка во „управувањето со промени“. Недостигот од доверба е ограничување на протокот. Ниската доверба значи мала употреба, што значи мало влијание.

Лидерите создаваат услови за вработените да ги прифатат промените. Нивните работници имаат 2,1 пати поголема веројатност да им веруваат на сознанијата генерирани од ВИ и да постапуваат врз основа на нив во секојдневната работа.

Довербата се поттикнува преку вклучување на вработените да експериментираат со ВИ, што може да доведе до нови идеи што ги поддржуваат приоритетите на компанијата. Лидерите во употреба на ВИ им обезбедуваат континуирано учење на своите вработени, а особено се внимателни и по прашањето за безбедноста обезбедувајќи заштитни механизми и протоколи.

„Кога луѓето разбираат што смее да прави ВИ, кои прашања бараат ескалација и кој е одговорен, тие можат да ја користат ВИ со поголема доверба“, покажува истражувањето.

Близу половина од компаниите не очекуваат намалување на бројот на вработени

Истражувањето покажува дека лидерите во користење ВИ имаат речиси двојно поголема веројатност да ја користат технологијата на повисоки нивоа на софистицираност, а не само за рутински работи. Кај нив за 2,8 пати е поголема веројатноста да го зголемат бројот на одлуки донесени без човечка интервенција. Овие лидери исто така пријавуваат многу поголеми подобрувања во квалитетот на одлуките, што е потсетник дека автоматизацијата најдобро функционира кога квалитетот се подобрува паралелно со брзината.

„Ова не значи автоматски дека машините ги преземаат работните места на сите. Целосната автономност сè уште е исклучок: само 15 отсто од лидерите во ВИ велат дека нивниот најсофистициран случај на употреба е автономен и самостојно се подобрува. Дополнително, иако 48 отсто од лидерите во ВИ очекуваат намалување на бројот на вработени за најмалку 5 отсто поради ВИ, други 49 отсто очекуваат од мала до никаква промена во бројот на вработени или зголемување на бројот на вработени. Конечно, во многу случаи видовме дека непосредната промена не е отстранувањето на луѓето, туку отстранувањето на доцнењето: ВИ се справува со повторливите процени во рамките на заштитните механизми, додека луѓето се фокусираат на исклучоците, компромисите и насочувањето на одлуките кон стратешките цели“, се наведува во истражувањето.