Шопингот на Американците со помош на ВИ ќе порасне за 130 отсто за време на празниците

Она што луѓето ќе го купуваат онлајн оваа празнична сезона во САД ќе биде сè повеќе под влијание на чет-ботови како што е Чет ГПТ (ChatGPT) на „Опен еј-ај“ (OpenAI), според „Адоуб“ (Adobe Inc).

Сообраќајот потпомогнат од вештачка интелигенција до американските малопродажни сајтови ќе се зголеми за 130 отсто во однос на пред една година, соопшти компанијата во понеделник. Купувачите кои користат вештачка интелигенција како алатка за истражување имаат поголема веројатност да купат нешто и ќе потрошат повеќе за секоја трансакција од оние кои доаѓаат од канали кои не се од вештачка интелигенција, соопшти „Адоуб“.

Онлајн продажбата целокупно ќе се зголеми за 6,7 отсто на 275,1 милијарди долари во ноември и декември, според „Адоуб“, кој следи повеќе од 1 билион посети на американски веб-страници. Годишното бран на масовна потрошувачка ќе даде индиции за тоа како купувањето потпомогнато од ботови еден ден би можело да го трансформира пазарот за дигитално рекламирање од 400 милијарди долари, доминиран од „Алфабет“, „Мета“ и „Амазон“.

„Потрошувачите стануваат повеќе комотни да водат дијалог со агент, да добиваат препораки и да одат на малопродажната страница после тие разговори“, рече Вивек Пандја од „Адоуб“. „Тие навистина се потпираат на агентот да го направи ова истражување за нив и брзо да ги синтетизира резултатите.“

Анализата на „Адоуб“ за купување со помош на вештачка интелигенција се фокусира на сообраќајот од независна платформа како Чет ГПТ или Клод на „Антропик“ до малопродажните сајтови. Не ги вклучува пребарувањата преку четбот што започнуваат во онлајн продавница како „Амазон“ или „Волмарт“ бидејќи тие купувачи веќе се таму.

Иако потрошувачите почнуваат да им веруваат на ботовите за поедноставување на пребарувањето на производи, само мал дел користат вештачка интелигенција за да извршат купување. И дури и ако луѓето сакаат да користат бот за купување за да купат нешто на „Амазон“, не можат бидејќи компанијата ги блокираше ВИ асистентите од „Перплексити“ и „Мета“.

Електрониката и облеката ќе продолжат да бидат најголемите категории за време на празниците, но трошењето за намирници и играчки ќе расте со побрзо темпо, според „Адоуб“. Најголемите попусти ќе бидат понудени во петдневниот период од Денот на благодарноста до Сајбер понеделник, кога правосмукалките и видео игрите ќе забележат најбрз раст на продажбата, соопшти фирмата.