ВИ индустријата мора да преземе одговорност за ризиците и да најде решенија

Американскиот министер за финансии Скот Бесент ги критикуваше предупредувањата на истакнати личности од областа на вештачката интелигенција за егзистенцијалните ризици што ги носи технологијата, нарекувајќи ги алармантни и некорисни, и ја повика индустријата самата да се регулира и да понуди решенија.

„Верувам дека мора да бидеме подготвени за секоја ситуација, но од друга страна, оваа паника без решенија од дел од заедницата за вештачка интелигенција не е лидерство“, изјави Бесент за „Аксиос“ во интервју објавено во саботата.

Извршниот директор на „Антропик“, Дарио Амодеи, шефот на „Опен еј-ај“, Сем Алтман, и Илон Маск од „Екс еј-ај“ во септември повикаа индустријата да го забави развојот на своите најнапредни модели, наведувајќи ги сè поголемите ризици за човештвото. Коосновачот на „Мајкрософт“, Бил Гејтс, исто така предупреди дека технологијата е доволно моќна да предизвика „милијарда смртни случаи“ и повика на владина регулација.

Претседателот Доналд Трамп речиси веднаш ги отфрли таквите повици, нарекувајќи ги сè помрачните предупредувања за ризиците за човештвото „измама“ и инсистирајќи дека САД мора да продолжат напред за да го задржат водството пред Кина, став што Бесент го повтори во своите изјави за „Аксиос“. „Не смееме да дозволиме да го загубиме водството пред Кинезите“, рече тој.

„Луѓето во лабораториите се тие што мора да ја прифатат одговорноста и јас се согласувам со тоа“, рече Бесент. „Мислам дека и лабораториите почнаа да размислуваат на тој начин.“

Без нови регулативи

На состанок со водечки директори од индустријата, меѓу кои Маск, извршниот директор на „Мајкрософт“, Сатја Надела, Марк Закерберг од „Мета“, извршниот директор на „Палантир“, Алекс Карп, и претседателот на „Опен еј-ај“, Грег Брокман, оваа недела американскиот претседател ја отфрли идејата за нова федерална регулатива.

„Постои уверување дека треба да има значителна саморегулација, а ние автоматски имаме регулација преку Министерството за правда, ФБИ и сето тоа, но саморегулацијата е многу важна“, им рече Трамп тогаш на новинарите. Наместо тоа, тој ја поддржа идејата надворешни ревизори да ја проценуваат безбедноста на системите со вештачка интелигенција во рамките на необврзувачки договор со лидерите од Силициумската долина.

Бесент изјави за „Аксиос“ дека САД исто така ќе настојуваат да ги ублажат ризиците преку билатерален систем за известување со Кина, чија цел е да ја намали неизвесноста, да овозможи споделување предупредувања за сериозни инциденти и да им помогне на двете влади да реагираат пред проблем поврзан со вештачката интелигенција да ескалира или да се прошири на глобално ниво.

Министерот за финансии и кинескиот вицепремиер Хе Лифенг разговараа за вештачката интелигенција за време на разговорите во Њујорк во септември, при што соопштија дека двете земји се согласиле да воспостават „американско-кинески дијалог за вештачка интелигенција“, во обид да развијат заедничко разбирање за придобивките и заканите од технологијата. Тие се сретнаа непосредно пред самитот меѓу претседателите Доналд Трамп и Шји Џјинпинг во Вашингтон, каде што вештачката интелигенција беше една од темите.

За време на посетата, Шји му рекол на Трамп дека Кина и САД можат да продолжат да разговараат за вештачката интелигенција, да разменуваат ставови за нејзините ризици и придобивки и да соработуваат за да ја спречат нејзината злоупотреба, објави кинеската новинска агенција „Синхуа“.

Бесент изјави дека разговарале за ризици како што се неконтролирани агенти со вештачка интелигенција и користење на вештачката интелигенција од недржавни актери за сајбербезбедносни или биолошки закани.

„Многу од овие кинески модели се мошне моќни, не толку моќни како американските модели, но добивате нешто што е 80 или 90 отсто моќно, без заштитни механизми, а кое може да биде увезено насекаде во светот“, изјави Бесент.

Сепак, на прашањето за повиците на директорите од индустријата за вештачка интелигенција за регулација, Бесент одговори: „Па, тогаш треба да забават.“

„Сакаме безбедно забрзување“, рече тој. „Луѓето во лабораториите се тие што мора да ја прифатат одговорноста и јас се согласувам со тоа.“