„Епл“ преговара за договор од милијарда долари годишно со „Гугл“ за надградба на Сири

„Епл“ (Apple Inc.) планира да плаќа околу една милијарда долари годишно за ултрамоќниот модел на вештачка интелигенција со 1,2 билион параметри, развиен од „Гугл“ (Alphabet Inc.), кој ќе помогне во долгорочно најавената целосна надградба на гласовниот асистент Сири (Siri), велат извори запознаени со договорот.

По долготраен процес на евалуација, двете компании се во завршна фаза на преговори за спогодба што ќе му овозможи на „Епл“ пристап до технологијата на „Гугл“, посочуваат анонимните изворите. 

Производителот на „ајфон“ (iPhone) смета дека со помошта од „Гугл“ ќе ја реконструира основната технологија на Сири, подготвувајќи терен за нова генерација функции што треба да бидат претставени следната година. Моделот на „Гугл“ со 1,2 билион параметри – мерка за комплексноста на софтверот – далеку ги надминува капацитетите на сегашните модели на „Епл“.

Компанијата претходно размислувала да користи други надворешни модели, меѓу кои Џемини (Gemini), ЧетГПТ (ChatGPT) и Клод (Claude) од „Антропик“ (Anthropic), но по тестирањата на почетокот на годинава се одлучила за „Гугл“, објави „Блумберг“. Целта е технологијата да се користи како привремено решение додека сопствените модели на „Епл“ не станат доволно напредни.

Новата верзија на Сири е планирана за следната пролет, наведува „Блумберг“. Бидејќи до лансирањето има уште неколку месеци, можно е деталите од договорот и партнерството да се променат. Претставници на „Епл“ и на „Гугл“ одбиле да коментираат.

Bloomberg

Акциите на двете компании во средата накратко пораснаа до највисокото ниво во текот на тргувањето по објавата на веста. Акциите на „Епл“ се зголемија за помалку од 1 отсто, достигнувајќи 271,70 долари, додека акциите на „Алфабет“ пораснаа за 3,2 отсто, до 286,42 долари.

Новосоздадениот систем Џемини (Gemini) претставува значителен напредок во однос на моделот со 150 милијарди параметри, што моментално се користи во облачната верзија на „Епл интелиџенс“ (Apple Intelligence). Потегот значително ќе ги зголеми моќта на системот и неговата способност за обработка на сложени податоци и разбирање контекст.

Иницијативата, позната под кодното име „Гленвуд“ (Glenwood), за подобрување на Сири (Siri) со надворешен модел ја водат Мајк Роквел, креаторот на хедсетот „Вижн про“ (Vision Pro), и Крег Федериги, шеф на софтверското инженерство во „Епл“. Новиот гласовен асистент, кој треба да биде достапен со iOS 26.4, е кодирано означен како Линвуд (Linwood).

Според договорот, моделот Џемини на „Гугл“ ќе ги управува функциите за сумирање и планирање во Сири – компонентите што му овозможуваат на асистентот да синтетизира информации и да одлучува како да изврши сложени задачи. Некои функции на Сири ќе продолжат да се потпираат на внатрешните модели на „Епл“.

Моделот ќе работи на сопствените сервери на „Епл“, со што ќе се гарантира дека корисничките податоци остануваат изолирани од инфраструктурата на „Гугл“. „Епл“ веќе има распределено серверска опрема за поддршка на моделот.

Иако партнерството е значајно, најавата најверојатно нема да биде јавно промовирана. „Епл“ ќе го третира „Гугл“ како технолошки снабдувач во заднина, што ќе го направи договорот различен од оној за пребарувачот „Сафари“ (Safari), со кој „Гугл“ стана основен пребарувач.

Договорот, исто така, е одвоен од претходните разговори за директна интеграција на Џемини во Сири како четбот. Тие преговори биле блиску до реализација во 2024 и почетокот на оваа година, но на крајот не резултирале со конкретна функција. Партнерството исто така не предвидува интеграција на ВИ-пребарувањето на „Гугл“ во оперативните системи на „Епл“.

При последната презентација на извештајот за заработка, извршниот директор на „Епл“, Тим Кук, изјави дека Сири во иднина би можела да понуди и други четботови – освен сегашната опција со ЧетГПТ.

„Епл“ не е единствената компанија што го користи Џемини за напојување на ВИ-функциите: „Снеп“ (Snap Inc.) и уште неколку големи компании веќе градат сопствени решенија врз платформата „Вертекс ВИ“ (Vertex AI) на „Гугл“. Но за „Епл“, овој потег претставува признавање дека заостанал во развојот на вештачката интелигенција – и дека сега е подготвен да се потпре на надворешна технологија за да го надомести јазот.

Сепак, „Епл“ не сака Џемини да остане долгорочно решение. Иако компанијата губи кадри од одделот за ВИ, вклучувајќи го и раководителот на тимот за модели, раководството планира да продолжи со развој на сопствена технологија и на крајот да го замени Џемини со внатрешно решение. Според изворите, тимот веќе работи на облачен модел со 1 билион параметри, кој би можел да биде подготвен за комерцијална употреба веќе следната година.

Раководството на „Епл“ верува дека може да достигне квалитет сличен на приспособената верзија на Џемини, но „Гугл“ постојано ја унапредува својата технологија, па надоместувањето на заостанувањето нема да биде лесно.

Моделот Џемини 2.5 про (Gemini 2.5 Pro) во моментов се наоѓа на врвот на повеќето ранг-листи што ги споредуваат големите јазични модели – основата на генеративната вештачка интелигенција.

Во меѓувреме, „Епл“ продолжува со напорите да ги донесе „Епл интелиџенс“ и новата Сири во Кина. Поради долгогодишната забрана за производите на „Гугл“ во земјата, локализираната верзија на Сири веројатно нема да се потпира на Џемини.

Приспособената верзија на „Епл интелиџенс“ ќе користи внатрешни модели и филтер развиен од „Алибаба“ (Alibaba Group Holding Ltd.), кој ќе ја приспособува содржината во согласност со барањата на кинеските власти, објави „Блумберг“ претходно.. „Епл“ исто така разгледува можност за партнерство со „Баиду“ (Baidu Inc.) за своите ВИ-понуди на кинескиот пазар.