Што се случува кога телефонот ќе почне да купува наместо тебе?

Замислете да ве повика непознат број. Наместо вие да одговорите, телефонот го прави тоа сам, поставува прашање кој се јавува и зошто, и ви прикажува транскрипт во реално време додека вие молчите. Истиот тој телефон може да го замолите да нарача вечера - тој отвора апликација, наоѓа ресторан, избира јадења и ја подготвува нарачката, а од вас бара само клик на „потврди плаќање“. Ова не е опис на уред од 2030 година. Ова е „самсунг галакси С26“, кој се продава од март 2026 година.

Од асистент до агент

Она што се промени не е само технологијата туку и самата категорија на уреди. Со години гласовните асистенти ни одговараа на прашања и ни поставуваа аларми. Гемини, системот на „Гугл“ за вештачка интелигенција вграден во „галакси С26“, го прескокнува разговорот и преминува директно на акција: сам отвора апликации, избира опции и пополнува форми наместо вас. „Гугл“ го нарекува ова автоматизација на екранот (англ. Screen Automation).

Конкретноста тука е клучна. Ако побарате кафе со популарен неформален назив што не постои во официјалната понуда на „Старбакс“, Гемини знае кој е вистинскиот назив и сам го пронаоѓа. Раните тестери го опишуваат гледањето телефон што сам се користи како „помалку вознемирувачко“, што всушност е добар знак бидејќи значи дека технологијата функционира. Покрај нарачување храна и резервирање превоз, „галакси С26“ има и „откривач на измами“ (Scam Detection), систем што ги анализира повиците во реално време и предупредува на измама. Анализата се одвива директно на уредот, без испраќање податоци во облак.

ВИ-системите на „Гугл“ веќе ги штитат корисниците од повеќе од 10 милијарди злонамерни повици и пораки месечно, а заканите стануваат посложени бидејќи криминалците користат ВИ за имитација на гласови и постепено градење доверба пред да побараат пари.

„Епл“ до оваа точка стигна по неочекуван пат. Компанијата задоцни една година со обновената Сири и на крајот потпиша договор со „Гугл“ вреден околу милијарда долари годишно, според кој новата Сири ќе работи на моделите на „Гугл“. Ни „Епл“ не успеа да го реши проблемот самостојно.

 

Кога најмоќната функција на телефонот не работи овде

Истражувањето на „Самсунг“ на 2.000 испитаници открива дека 90 проценти од Американците веќе користат ВИ на телефон, но само 38 проценти знаат за тоа. Кога ќе им се прикаже листа на конкретни функции, 84 проценти потврдуваат дека ги користат секојдневно: автоматска корекција на текст, ноќен режим на камерата, временски предупредувања. Вештачката интелигенција веќе е тука - само не ја препознаваме.

За корисниците во нашиот регион, невидливоста е буквална. Автоматизацијата на екранот (Screen Automation) засега поддржува исклучиво „Дордаш“ (DoorDash), „Убер итс“ (Uber Eats), „Убер“ (Uber), „Лифт“ (Lyft) и уште неколку американски сервиси, достапна е само во САД и Јужна Кореја и нема интеграции со апликациите што овде ги користиме секојдневно: ни „Глово“, ни „Волт“, ни која било локална достава. Оној што платил повеќе од 1.700 евра за „галакси С26 ултра“ во Белград, Сараево или Загреб, купил телефон што може да нарача вечера во Њујорк, но не може да нарача пица од соседната улица.

Проширувањето доаѓа, само без датум. „Гугл“  најави дека андроид 17, очекуван кон крајот на 2026 година, ќе донесе автоматизација на екранот на повеќе пазари и апликации. „Волт“ е во сопственост на „Дордаш“, кој веќе е интегриран, па е најблискиот кандидат за европско проширување. „Глово“, дел од германскиот „Деливери хиро“ (Delivery Hero), нема директна врска со партнерите на „Гугл“. Засега, регионот чека.

Удобноста има своја цена

За бизнис-луѓето во регионот, вистинското прашање не е дали ВИ-асистентот е погодна работа. Кога Гемини ќе стане вообичаен канал за нарачување, ресторан што не е добро читлив за ВИ-системот ќе биде прескокнат без причина што можете да ја видите или оспорите. Компаниите што не ги приспособуваат податоците за машинско читање губат купувачи, кои никогаш нема ни да ги видат. Истото тоа важи и за хотелите, превозот и е-трговијата. Кога ВИ станува интерфејс, маркетингот повеќе не се насочува кон луѓе, туку кон системи што одлучуваат наместо нив.

Постои и поширок проблем: за Гемини да ја нарача вечерата, потребен му е пристап до вашите контакти, локација, историја на нарачки и начини на плаќање. Експертите по етика предупредуваат дека системите што „само работат“ можат и „само да туркаат“, обликувајќи ги вашите избори - од ресторан до купување - без да размислувате свесно за тоа. ВИ што го прави животот полесен и ВИ што ги учи вашите навики заради продажба се во суштина истиот систем. Разликата е само во тоа кој го користи и во чија корист.