„Самсунг“ забрани вработените да користат вештачка интелигенција

Компанијата „Самсунг“ (Samsung Electronics Co.) ја забранува употребата на популарните алатки за генеративна вештачка интелигенција (како што е ЧетГПТ) од страна на вработените, откако откри дека персоналот поставил чувствителен код на платформата, што го попречува ширењето на таквата технологија на работното место.

Компанијата со седиште во Сувон, Јужна Кореја, во понеделникот го известила персоналот на еден од своите најголеми оддели за новата мерка преку белешка во која имал увид „Блумберг њуз“. Компанијата е загрижена дека податоците што се пренесуваат на таквите платформи за вештачка интелигенција, вклучувајќи ги Гугл Бард и Бинг, се складираат на надворешни сервери, што отежнува да се повратат и избришат и може да бидат откриени од други корисници, се вели во документот.

Компанијата минатиот месец спроведе истражување за внатрешната употреба на алатки за вештачка интелигенција и посочи дека 65 отсто од испитаниците веруваат дека таквите услуги претставуваат безбедносен ризик. Претходно во април од инженери на „Самсунг“ случајно протекол внатрешен код, поставувајќи го на ЧетГПТ, според белешката. Не е јасно што конкретно опфаќала таквата информација.

Претставник на „Самсунг“ потврди дека минатата недела била испратена белешка со која се забранува користење услуги за генеративна вештачка интелигенција.

Bloomberg Mercury

„Интересот за генеративните платформи за вештачка интелигенција, како што е ЧетГПТ, расте внатрешно и надворешно“, се наведува во обраќањето на компанијата до персоналот. „Иако овој интерес се фокусира на корисноста и ефикасноста на овие платформи, исто така постои растечка загриженост за безбедносните ризици што ги претставува генеративната вештачка интелигенција“.

„Самсунг“ е последна во низата големи компании што изразија загриженост за технологијата. Во февруари, само неколку месеци откако четботот на „Опен еј-ај“ (OpenAI) предизвика бура од интерес, некои банки на Волстрит, вклучувајќи ги „ЏП Морган“ (JPMorgan Chase & Co.), Банката на Америка“ (Bank of America Corp.) и „Ситигруп“ (Citigroup Inc.), или ја забранија или ја ограничија неговата употреба. Италија исто така ја забрани употребата на  ЧетГПТ поради стравувањата за приватноста, иако го промени својот став во последните денови.

Новите правила на „Самсунг“ забрануваат употреба на системи за генеративна вештачка интелигенција на компјутери, таблети и телефони во сопственост на компанијата, како и на нејзините внатрешни мрежи. Тие не се однесуваат на уредите што компанијата им ги продава на клиентите, како што се паметните телефони и лаптопите.

„Самсунг“ побара од вработените што користат ЧетГПТ и други алатки на лични уреди да не внесуваат никакви информации поврзани со компанијата или лични податоци што би можеле да откријат негова интелектуална сопственост. Компанијата предупреди дека прекршувањето на новите политики може да резултира со отпуштање.

„Бараме внимателно да се придржувате до нашите безбедносни упатства, бидејќи ако не го сторите тоа, може да дојде до прекршување или компромитирање на информациите на компанијата, што ќе резултира со дисциплински мерки, вклучувајќи и прекинување на работниот однос“, се наведува во белешката од „Самсунг“.

Во меѓувреме компанијата создава свои внатрешни алатки за вештачка интелигенција за превод и сумирање документи, како и за развој на софтвер. Исто така работи на начини да го блокира поставувањето чувствителни информации за компанијата на надворешни услуги. Минатиот месец ЧетГПТ додаде режим „инкогнито“ што им овозможува на корисниците да ја блокираат својата комуникација и истата таа да не се користи за обука на моделите за вештачка интелигенција.

„Ги разгледуваме безбедносните мерки за да создадеме безбедна средина за користење генеративна вештачка интелигенција што ќе ги подобри продуктивноста и ефикасноста на вработените“, се наведува во белешката. „Сепак, додека не се подготват овие мерки, привремено ја ограничуваме употребата на генеративна вештачка интелигенција“.

Во моментов нема коментари за веста. Биди прв да коментира...

Остави коментар