Во „Ферари“ за влакно избегната дипфејк измама што го имитирала извршниот директор

Било вторник наутро овој месец кога директор на „Ферари“ (Ferrari NV) почнал да добива куп неочекувани пораки, навидум од извршниот директор.

„Еј, дали слушна за големата аквизиција што ја планираме? Може да ми треба твојата помош“, гласи една од пораките за кои се тврди дека се од главниот извршен директор Бенедето Виња.

Пораките на Ватсап (WhatsApp), во кои „Блумберг“ имал увид, не потекнуваат од вообичаениот службен мобилен број на Виња. Сликата на профилот исто така е поинаква, иако е слика на извршниот директор со очила, кој позира во костум и вратоврска, со преклопени раце, пред логото на „Ферари“.

„Бидете подготвени да го потпишете договорот, нашиот адвокат треба да ви го испрати што поскоро“, гласи друга порака од имитаторот на Виња. „Италијанскиот пазарен регулатор и берзата во Милано се веќе информирани. Бидете подготвени и ве молам со најголема дискреција“.

Она што се случило потоа, според луѓе запознаени со случувањата, била една од најновите примени на дипфејк (англ. deepfake) алатки за спроведување телефонски разговор во живо, чија цел била инфилтрација во меѓународно признаен бизнис. Италијанскиот производител на суперавтомобили излезе неповредено откако директорот што го примил повикот сфатил дека нешто не е во ред, велат упатени извори, кои побараа да останат анонимни поради чувствителноста на ова прашање.

Гласот што го имитирал Виња бил убедлив - беспрекорна имитација на јужноиталијански акцент.

Дипфејкерот на Виња почнал да објаснува дека се јавува од друг број на мобилен телефон бидејќи треба да разговара за нешто доверливо - договор што може да се соочи со некои проблеми поврзани со Кина и бара да се изврши неодредена трансакција.

Директорот бил шокиран и почнал да се сомнева, велат изворите. Почнал да забележува многу мали механички интонации, кои само ја продлабочиле неговата сомничавост.

„Извинете, Бенедето, но треба да ве идентификувам“, рекол директорот. Тој поставил прашање како бил насловот на книгата што Виња му ја препорачал неколку дена претходно (тоа била Decalogue of Complexity: Acting, Learning and Adapting in the Incessant Becoming of the World од Алберто Феличе Де Тони)?

Со тоа повикот ненадејно завршил. „Ферари“ отворил внатрешна истрага, велат изворите. Претставниците на компанијата со седиште во Маранело, Италија, одбија да коментираат за ова прашање.

Растечки тренд

Ова не е прв обид да се имитира директор од висок профил. Во мај беше објавено дека Марк Рид, извршниот директор на рекламниот гигант ВПП (WPP Plc), исто така бил цел на, на крајот неуспешна, но слично разработена дипфејк шема, која го имитирала на повик на Тимс (Teams).

„Годинава гледаме зголемување на криминалците што се обидуваат со гласовни манипулации користејќи вештачка интелигенција“, рече во интервју Рејчел Тобак, извршна директорка на компанијата за обука за сајбер-безбедност „Сошл пруф“ (SocialProof Security).

Иако овие алатки за генеративна вештачка интелигенција можат да создадат убедливи лажни слики, видеа и снимки, тие сè уште не се покажаа доволно убедливи за да предизвикаат широкораспространета измама, за што многумина предупредуваат.

Сепак, некои компании станаа жртви на измамници. Претходно годинава неименувана мултинационална компанија загуби 26 милиони долари откако измамници ги измамиле нејзините вработени во Хонгконг користејќи дипфејк технологија, објави во февруари „Саут Чајна морнинг пост“ (South China Morning Post). Измамниците во видеоповик фабрикувале лажна верзија на главниот финансиски директор на компанијата и други луѓе и ја убедиле жртвата да префрли пари.

Во моментов нема коментари за веста. Биди прв да коментира...

Остави коментар