Асоцијацијата на македонската индустрија за видеоигри (МГИ) и „Бит Алијанса“, водечката ИТ асоцијација од Босна и Херцеговина (БиХ) потпишаа меморандум за соработка со цел зајакнување на индустријата за игри на Балканот.
Меморандумот беше потпишан од извршниот директор на „Бит Алијанс“, Дамир Маглајлиќ и претседателот на МГИ, Гораст Цветковски, за време на заедничкиот регионален состанок на групацијата од Западен Балкан што се одржа во Пераст (Црна Гора).
Цветковски рече дека ова е важен чекор за заедничката индустрија, особено за младите програмери.
„Ова е клучен чекор во поттикнувањето на иновациите и создавањето нови можности за развивачите на игри од сите возрасти“, рече Гораст Цветковски, претседател на МГИ.
„Заедно, ние сме посветени на поддршка на стартапи, организирање заеднички настани и застапување на политики кои ќе бидат од корист за целата индустрија за игри во нашиот регион. Соработката ќе овозможи заедничка работа за подобрување на политиките и обезбедување поголеми можности за раст на секторот за игри во регионот. Се очекува оваа иницијатива да донесе позитивни промени во регионалната индустрија за видеоигри и дополнително да ги поврзе пазарите во регионот“, изјави Цветковски.
Во фокусот на договорот ќе биде поддршката на развојот на стартапи за игри, организирање заеднички настани и промоција на индустријата преку размена на знаење.
„Преку оваа соработка со МГИ, веруваме дека ќе успееме да изградиме платформа која ќе обезбеди подобра видливост и поддршка за развојните тимови. Нашата цел е да создадеме средина каде што младите програмери ќе имаат можност за реализација на нивните идеи, но и на регионалната гејминг сцена да се позиционираат како релевантни играчи“, рече Маглајлиќ, пренесе „Бит Алијанс“.
.webp){kind=icon}