„Бајтденс“ (ByteDance) и „Бродком“ (Broadcom) разговараат за потенцијална соработка кога станува збор за процесот за вештачка интелигенција (ВИ), со цел компанијата креатор на Тикток (TikTok) да го поттикне развојот на технологијата.
Американскиот дизајнер на чипови и компанијата со седиште во Пекинг се во преговори за наменски изработен чип од пет нанометри, тврди упатен извор. Сè уште не е постигнат договор меѓу двете компании, а „Бродком“ веќе доставува постара генерација процесори со вештачка интелигенција од седум нанометри до центрите за податоци на „Бајтденс“.
Предложениот чип не би отстапувал од американските трговски ограничувања кон Кина, објави „Ројтерс“, цитирајќи неименувани извори. Тековните деловни односи на двете компании главно се вртат околу мрежна и серверна опрема, а „Бродком“ го истакнува „Бајтденс“ како купувач во своите соопштенија за печатот.
Во март американската компанија им соопшти на инвеститорите дека има нов купувач во бизнисот со акцелератори со вештачка интелигенција и дека ќе ѝ испорача производи на компанијата во следните неколку месеци, без да ја именува.
Доколку компаниите постигнат договор, наменскиот чип за вештачка интелигенција ќе биде изработуван од ТСМЦ (Taiwan Semiconductor Manufacturing Co.), објави „Ројтерс“.
Врската помеѓу сопственикот на Тикток и двете глобални компании за производство на полупроводници е невообичаена, имајќи предвид дека Вашингтон активно се обидува да ги ограничи амбициите на Кина за производство на чипови преку серија силни санкции за производство и извоз.
Договорот има цел да обезбеди стабилно снабдување со чипови за „Бајтденс“, која управува со најголемата светска платформа за кратки видеосодржини. Инаку, нејзиниот Доубао (Doubao) стана најпопуларниот четбот со вештачка интелигенција во Кина годинава.
Глобалните ривали на кинеската компанија, „Мета“, „Мајкрософт“ и „Гугл“, развиваат или веќе користат свои чипови направени по мера за задачи од сферата на вештачката интелигенција. „Бајтденс“ вели дека ќе се обиде да остане во чекор со своите американски ривали, бидејќи оваа година ја направи технологијата за вештачка интелигенција свој приоритет.
Претставниците на „Бајтденс“, „Бродком“ и ТСМЦ не одговорија на барањата за коментар.
.webp){kind=icon}
