„Амазон“ (Amazon.com Inc.) претставува освежена серија на уредот „киндл“ (Kindle), вклучувајќи го и првиот модел кој може да прикажува бои, откако компанијата започна со производство на овој е-читач пред 17 години.
„Киндл колорсофт“ (Kindle Colorsoft) започнува со цена од 280 долари и ќе биде достапен за испорака на крајот од месецот, објави компанијата. Моделот ќе им овозможи на корисниците да ги гледаат кориците на книгите и сликите во боја, што ќе им олесни на луѓето да обележуваат содржини, соопшти „Амазон“.
„Амазон“ долго време го произведува најпродаваниот е-читач, но сега се соочува со конкуренција од уреди како што се „нук“ (Barnes & Noble Nook), „кобо“, (Rakuten Kobo) и „букс“ (Onyx Boox), кои веќе нудат прикажување во боја. Новиот модел може да помогне во задржување на корисниците да не преминат на конкурентни модели.
„Амазон“ исто така најави нова верзија на „киндл скрајб“ (Kindle Scribe), модел од 400 долари кој овозможува корисниците да пишуваат белешки со пенкало-стилус, како и обновен модел од почетно ниво за 110 долари. Исто така, има и освежена верзија на уредот наменет за млади читатели.
Компанијата наведува дека батеријата на новите модели трае од неколку недели до три месеци — што е предност во споредба со таблетите или телефоните, кои често треба да се полнат секоја вечер.
„Киндл“, првпат претставен во 2007 година, беше првиот уред за потрошувачи на „Амазон“. Тој беше лансиран во време кога книгите беа суштински дел од бизнисот на компанијата. Во последно време, е-читачот е засенет од пробивот на компанијата во други области на потрошувачката електроника, вклучувајќи го дигиталниот асистент „алекса“ (Alexa), видео-ѕвоната „ринг“ (Ring), таблети и уреди за стриминг.
„Амазон“ соопштио дека нивниот бизнис со „киндл“ е профитабилен, главно благодарение на приходите од книги и претплати. Продажбата минатата година го достигна највисокото ниво во последната деценија, при што најголемиот дел од купувањата доаѓаат од нови корисници, соопшти компанијата од Сиетл.
.webp){kind=icon}
Во моментов нема коментари за веста. Биди прв да коментира...