Роботакси возилата на „Тесла“ биле вклучени во најмалку 14 сообраќајни инциденти во Остин, Тексас, во првите осум месеци од почетокот на услугата, покажуваат податоци доставени до американските регулатори. Дел од инцидентите резултирале со полесни повреди и хоспитализација, а еден случај вклучувал судир со градски автобус.
Според извештаите поднесени до НХТСА (National Highway Traffic Safety Administration / NHTSA), компанијата е обврзана да пријавува несреќи во кои се вклучени системи за автоматизирано управување.
Првиот регистриран инцидент се случил во јули, еден месец по лансирањето на услугата. Првично бил пријавен како случај со материјална штета, но во декември компанијата доставила дополнителен извештај со информација дека имало и полесни повреди и хоспитализација. Уште еден инцидент од јули, исто така, предизвикал полесни повреди.
Во јануари биле пријавени пет нови случаи што се случиле во декември и јануари. Меѓу нив има судир меѓу роботакси возило и јавен автобус на градот Остин, како и два случаја во кои возилата се движеле наназад и удриле во објекти на паркинг-простори.
Услугата во Остин започна со околу десетина возила, секое со човечки безбедносен надзорник во автомобилот. По тестирањата во декември, во јануари компанијата започна да нуди и целосно автономни возења без присуство на надзорник во „неколку“ возила. Не е јасно дали некој од пријавените инциденти се случил со вакви возила.
Информациите во извештаите се ограничени, а за разлика од конкурентите, „Тесла“ ги редигира описните делови од настаните. Во најголем дел од случаите е наведена само материјална штета.
Остин останува единствениот град каде „Тесла“ нуди вистински автономна роботакси услуга. Во областа на Заливот на Сан Франциско компанијата лансираше услуга преку истата апликација, но таму возењата ги извршуваат вистински возачи, што ја прави услугата слична на платформите за превоз како „Убер“ (Uber).
Извршниот директор на „Тесла“, Илон Маск, сè поинтензивно ја насочува стратегијата на компанијата кон автономија и роботика, во време кога основниот бизнис со електрични возила се соочува со предизвици.
Главен конкурент на пазарот е „Вејмо“ (Waymo), компанија во сопственост на „Алфабет“ (Alphabet Inc.), која располага со околу 2.500 автономни возила во повеќе американски градови, вклучувајќи ги Феникс, Сан Франциско, Остин, Лос Анџелес, Атланта и Мајами. Во Остин управува со околу 200 возила преку апликацијата на „Убер“.
„Вејмо“ започна со јавни автономни возења во областа на Феникс уште во 2020 година и има пријавено стотици инциденти од јуни наваму, од кои околу 50 во Остин.
„Тесла“ најави проширување во уште седум градови до средината на годината, но слични најави за експанзија минатата година не беа реализирани. Засега, компанијата не открива колку возила има во тековната роботакси флота во Остин, иако во јануари Маск изјави дека заедно во Остин и областа на Заливот има околу 500 возила за споделено возење.
.webp){kind=icon}
