„Епл“ промовира „Мекбук Нео“ за 599 долари, заканувајќи му се на „Виндоус“

„Епл“ (Apple Inc) го претстави „Мекбук Нео“ (MacBook Neo) од 599 долари во својот најголем напор досега во лаптопите од ниска класа, со цел да им се спротивстави на компјутерите на „Виндоус“ (Windows) и на „Хромбук“ за купувачите со ограничен буџет.

Уредот е 400 долари поевтин од кој било лаптоп од нова генерација што „Епл“ го продал претходно, што е далеку под сегашниот „Мекбук Ер“ (МacBook Air) од 1.099 долари. „Мекбук Нео“ ќе се нуди во цитрусна, сребрена, индиго и румена боја, што потенцијално ќе го направи привлечен и за студентите и за мејнстрим потрошувачите.

„Мекбук“ има екран од 13 инчи, што го прави еден од најмалите лаптопи на компанијата досега. „Мекбук Ер“, пак, нуди екран од 13,6 инчи. Уште еден пресврт: „Нео“ работи на чип „Ајфон А18 Про“ (iPhone A18 Pro), што е прв пат „Епл“ да користи процесор за паметен телефон во „Мек“.

Ова е голем пресврт за „Епл“, која со децении се двоумеше да лансира „Мек“ лаптоп од ниска класа. Но, брзината на неговите „Ајфон“ процесори ѝ овозможи на компанијата значително да ги намали цените без значително да ги жртвува перформансите.

Во изјава, Џон Тернус, шефот на хардверското инженерство на „Епл“, рече дека „Мекбук Нео“ е „изграден од темел за да биде подостапен за уште повеќе луѓе“.

Основниот модел вклучува 256 гигабајти простор за складирање, додека надградената верзија од 699 долари го удвојува капацитетот и има тач ај-ди (Touch ID) за најавување и одобрување плаќања. Исто така, има попуст од 100 долари за секој модел за купувачи од образованието, со што почетната цена се намалува на 499 долари.

„Епл“ го објави уредот за претходна нарачка во среда и рече дека првичните испораки и достапноста во продавницата ќе се случат на 11 март.

Уредот има 16 часа траење на батеријата, споредено со 18 часа за најновиот „Мекбук Ер“ - модел кој има M5 чип. Екранот работи со осветленост до 500 нити и тежи 2,7 фунти, што е исто како и 13-инчниот „Ер“.

Уредот доаѓа со 8 гигабајти меморија, или РАМ меморија, 6-јадрен процесор, или главен процесор, и 5-јадрен графички процесор, или графичка компонента, без достапни надградби. Спецификациите се на исто ниво со „Ајфон 16 Про“ издаден во 2024 година.

Освен што ќе се насочи кон помали купувачи, „Епл“ ќе може да го претстави компјутерот како опција за корпоративни и организациски купувачи - со оглед на неговата пониска цена и компатибилност со апликациите и за „Мек“ и за „Ајфон“.

„Нео“ работи со брзини доволно моќни за дневни задачи како што се прелистување на веб, обработка на текст, уредување фотографии и видеоконференции. Дури и со чипот за „Ајфон“, уредот сè уште работи на истиот мекОс (macOS) оперативен систем што се наоѓа на другите „Мек“ компјутери.

„Мекбук Нео“ е направен од алуминиум, истиот премиум материјал што се користи кај лаптопите и десктоп компјутерите од повисока класа на „Мек“. Исто така, има целосна тастатура и тракпад, поддршка за вај-фај (WiFi 6E) и фејс (1080P FaceTime) камера, спецификации кои ги има и кај „Ер“ и другите „Епл“ лаптопи. Исто така, има поддршка за блутут 6 (Bluetooth 6).

Уредот има два УСБ-Ц (USB-C) порти и приклучок за слушалки за поврзување. Доаѓа со полнач од 20 вати, сличен на некои ајфони.  

 

Уредот е поскап од најевтините апарати „Хромбук“ и „Виндоус“, кои можат да се најдат по цена од 200 до 600 долари. Но, во споредба со тие производи, понудата на „Епл“ е многу попремиум со оглед на неговиот дизајн, карактеристики и внатрешни компоненти. Компанијата вели дека нејзиниот уред работи три пати побрзо за вештачка интелигенција од конкурентските лаптопи.

„Епл“ очекува прилив на нови клиенти во своите продавници за да ја испробаат новата понуда. „Епл“ гледа можност да привлече нови клиенти во својот екосистем на производи. Тоа би можело да отвори дополнителни можности за продажба на дополнителни уреди, ајфон, ајпад и Епл воч (Apple Watch).

Компанијата со седиште во Купертино, Калифорнија имаше разочарувачка празнична сезона за „Мек“, при што продажбата на компјутерската линија падна за 6,7 проценти на 8,39 милијарди долари. Аналитичарите предвидуваа повеќе од 9 милијарди долари.

Лансирањето завршува обемна недела на објавување производи за „Епл“, која ги лансираше „Ајфон 17е“ (iPhone 17e)и  „М4 Ајпад Ер“ (M4 iPad Air) во понеделникот, како и нови верзии на „Мекбук Про“, „Мекбук Ер“ и надворешните монитори „Студио Дисплеј“ (Studio Display) во вторникот.

Кон крајот на годината, „Епл“ е подготвена повторно да ја прекине традицијата со планови за „Мек“ со екран на допир.

— Со помош од Саманта Кели и Крис Велч