.webp){kind=icon}
Само за два дена горивата во земјава поскапеа за околу 12 денари по литар. Враќањето на ДДВ од 10 на 18 отсто и растечките цени на нафтата и доларот на глобалниот пазар, придонесоа цената на литар дизел се зголеми за 11,5 денари, а на БС 95 за 12 денари. Литар дизел сега на бензинските низ земјава се продава по цена од 97,5 денари, а литар БС 95 за рекордни 107 денари.
Со ваквите цени, горивата во земјава се доближија до тие на црногорските, хрватските и австриските бензински станици. Во моментов, поевтини горива има во Србија, Бугарија, Босна и Херцеговина и Словенија. Поскапи се дериватите во Грција.
И додека цените на горивата во земјава се меѓу поскапите споредено со регионот, просечната плата и натаму е најниска и покрај континуираниот раст во последните години. Заради законското регулирање на минималната плата и државната поддршка за исплата на повисоки плати, просечната плата во Северна Македонија во март изнесуваше 31.080 денари. Сепак, оваа сума е пониска од просечните примања во регионот.
Кога прсечната плата ќе се претвори во литри гориво, Македонците можат да купат многу помалку отколку жителите на сите земји во регионот. Со 31.080 денари во земјава може да се купат 290 литри бензин БС 95 или 320 литри дизел.
За просечна плата во Србија се купува 400 литри бензин или 368 литри дизел. Помалку дизел за просечна плата можат да купат само граѓаните на Босна и Херцеговина 303 литри, но затоа пак платата им стига за 337 литри безоловен.Цените на горивата во земјава сега се историски највисоки иако на светските берзи имало и поскапа нафта. На пример, црното злато на светските берзи највисока цена имаше во 2008 година за време на руско – грузискиот конфликт, барел тогаш чинеше 136 долари, а во земјава се продаваше по значително пониски цени или под 80 денари за литар.
Утрово на светските берзи барел нафта чинеше 113 долари. Слична цена енергенсот имал и во 2012 година, но тогаш во земјава литар БС 95 чинел 80, а литар дизел само 72,5 денари за литар.
Сегашните високи цени се должат на зголемените давачки кон државата, посебно по основ на акциза. Па така, од цената на литар бензин државата наплатува 45 отсто, а од литар дизел во буџетот се слеваат 38 отсто од цената.
