text size
Цените на суровините конечно забавија во 2023 година (до средината на јуни), главно поради потоплата зима (за цените на енергијата), Црноморската иницијатива за жито (за житариците) и послабата побарувачка од главните економии во светот (особено слабите ефекти од повторното отворање на Кина). Кај некои суровини цените се придвижија во спротивна насока, на пример кај шеќерот, а под влијание на лошите временски услови. Но, севкупно целиот пазар забележа пад, што влијаеше врз намалување на инфлациските притисоци, посочуваат од аналитичкиот тим на „Блумберг Адрија“ во новата анализа на трендовите на пазарот на суровини објавена на „Блумберг Адрија Инсајт“.
„Цените на клучните земјоделски производи што ги анализиравме се пониски во споредба со просеците од 2022 година, освен во случајот на шеќерот и живиот добиток. Минатата година беше исклучителна за земјоделството со високи цени и нестабилност предизвикана од почетокот на војната во Русија и Украина, која ја доведе во прашање достапноста и испораката на житариците. Исто така, неповолните временски услови и прекините на синџирот на снабдување беа клучните двигатели на цените, кои се фактори што треба да се следат понатаму“, велат нашите аналитичари.
Тие очекуваат пазарот на суровини во 2023 година да биде под влијание на повисоките каматни стапки, забавувањето на побарувачката и високата база од минатата година, што ќе доведе до надолен притисок врз цените.
„Кина во моментов е играчот што треба да се следи кога станува збор за пазарот на суровини. Имајќи предвид дека економскиот развој на Кина оди побавно од очекуваното, постои општо надолно повлекување на цените на суровините, со одредени позитивни ризици кои доаѓаат од напорите за забрзување на економијата (намалување на основната каматна стапка и можни фискални стимулации).“, велат аналитичарите.
Од аналитичкиот тим на „Блумберг Адрија“ сметаат дека цените на енергијата до крајот на 2023 година ќе стабилизираат околу сегашните нивоа.
„Иако цените се значително пониски во споредба со 2022 година, тие се‘ уште се над нивото од предвоениот период. Суровата нафта е под надолен притисок и очекуваме поради тоа ОПЕК + и натаму да го намали производството“, велат нашите аналитичари.
Тие очекуваат цената на суровата нафта од типот брент да биде околу 80 американски долари за барел во 2023 година.
„Според податоците од „Гас Инфрастракчр Јуроп“ (Gas Infrastructure Europe), складиштата за гас во ЕУ имаат исполнетост од 69 проценти на крајот на мај 2023 година, што е зголемување во однос на крајот на април, годинава кога беа исполнети 60 проценти од капацитетите за складирање. Тоа е повеќе од доволно за периодот до зимската сезона, па очекуваме силната понуда да ги одржи стабилни цените на природниот гас“, велат аналитичарите.
Од нашиот аналитички тим укажуваат дека цената на златото годинава најмногу се зголемила меѓу благородните метали.
„Сепак, ако економските несигурности се интензивираат во текот на остатокот од годината, сметаме дека златото ќе биде „безбедно засолниште“ за инвеститорите, што ќе ја зголеми неговата цена над 2.000 долари за унца“, велат од аналитичкиот тим.
Оттаму очекуваат надолни притисоци за земјоделските суровини во 2023 и 2024 година, поради високата база наследена од 2022 година (кога цените на енергијата, транспортот и агрохемикалиите беа зголемени), а кои сега се смируваат, но и бидејќи глобалното економско забавување влијае на побарувачката.
„Смирена е и состојбата со извозот на жита од Украина и Русија. Негативните ризици се присутни во форма на неочекувани временски шокови, комплицирање на геополитичката ситуација и побрзо закрепнување на глобалната побарувачка“, велат аналитичарите.
Со оглед на послабата економска перспектива, тие очекуваат надолни притисоци и врз цените на индустриските метали во 2023 година.
„Кај повеќето индустриски метали има ниски нивоа на залихи кои се намалија поради прекините во снабдувањето и послабата побарувачка од Кина. Очекуваме позитивни ризици за овој сегмент во случај на забрзување на економската активност на Кина и на стабилизирање на глобалната макроекономска слика (проследено со олеснување во монетарната политика).“, велат аналитичарите.
