Саудиска Арабија се интересира за учество во Лигата на шампионите

Саудиска Арабија е заинтересирана за преговори за приклучување во врвното европско фудбалско натпреварување - Лигата на шампионите, откако кралството почна да троши стотици милиони долари за да привлече некои од најдобрите играчи во светот и да го размрда спортот.

„Се обидуваме да бидеме поинакви, така што секаков вид на промена во форматот или подобрувања што може да се воведат во лигата ќе бидат добредојдени“, рече во интервју главниот оперативен директор на Саудиската Про лига (СПЛ), Карло Нохра.

СПЛ сè уште е „целосно посветена“ на учеството во азиската Лига на шампиони, која е најдоброто клупско натпреварување во Азија, рече тој. Какви било разговори за приклучување на тимовите од СПЛ во Лигата на шампионите во Европа, додаде тој, веројатно ќе бидат меѓу организаторот, УЕФА и Фудбалската федерација на Саудиска Арабија.

Меѓу членовите на УЕФА се неколку неевропски земји, вклучувајќи го и Казахстан, чии клубови можат да учествуваат во Лигата на шампионите.

Сепак, од УЕФА го упатија „Блумберг“ на коментарите кои овој месец ги даде нејзиниот шеф за фудбал, Звонимир Бобан. Одговарајќи на прашања за приклучување на саудиски клуб во Лигата на шампионите во 2025 година, тој за хрватскиот весник „Јутарњи лист“ ги отфрли ваквите навестувања како „измислица“.

Кристијано Роналдо Depositphotos

Тимовите од Саудиска Арабија потрошија околу 650 милиони долари во последниве месеци за ангажман на големи фудбалски ѕвезди меѓу кои и Карим Бензема од Реал Мадрид, Бразилецот Нејмар и Џордан Хендерсон од Ливерпул.

Кралството се обиде да го привлече и Аргентинецот Лионел Меси со огромен пакет за исплата, но тој избра да се приклучи на Интер Мајами во САД. Неодамнешните извештаи велат дека саудискиот клуб Ал-Итихад сака да ја купи египетската суперѕвезда, Мохамед Салах.

„Правиме сè што е потребно за тие играчи да дојдат во Саудиска Арабија“, рече Нохра, кој претходно работеше за ВВЕ (World Wrestling Entertainment Inc). „Тоа не значи дека станува збор за неограничени буџети. Но, не можеме да си ставиме лисици ако сакаме да донесеме некои од најдобрите таленти. Мораме да плаќаме по тековните тарифи за да ги донесеме овде“.

Во однос на заработката, СПЛ и понатаму е далеку во споредба најдобрите светски фудбалски лиги. Но, купувањето на истакнати играчи ги нагласува големите амбиции на Саудиска Арабија која сака да се диверзифицира од нафтата со огромни вложувања во различни области, од спорт до нови градови и електрични автомобили.

СПЛ иминатата година силно притискаше за да привлече повеќе спонзори и да потпише договори за емитување со меѓународни медиумски компании. Натпреварите од саудиската лига сега се емитуваат во околу 140 земји, рече Нохра, а приходите од емитување се зголемија за 650 отсто откако Португалецот Кристијано Роналдо направи трансфер од Манчестер Јунајтед кон крајот на минатата година.

„Тоа не се огромни приходи за да ги финансираме сите активности што ги имаме, но секако е значајно придвижување“, рече тој.

Растот на СПЛ е долгорочен процес и не постои одредена временска рамка за нејзиниот пробив.

„Зголемувањето на вредноста на лигата и клубовите е дефинитивно во срцето на она што го правиме“, рече тој. „Ако тоа ги направи клубовите и лигата инвестициски магнет, тогаш ќе ја постигневме целта“.

Во моментов нема коментари за веста. Биди прв да коментира...

Остави коментар