.webp){kind=icon}
„Капитал уан“ (Capital One Financial Corp.) ќе ја купи „Дискавер“ (Discover Financial Services) за 35 милијарди долари, создавајќи ја најголемата компанија за кредитни картички во САД по обем на заем. На новата компанија ќе ѝ биде полесно да се бори со жестоката конкуренција од Волстрит.
Според договорот, „Капитал уан“ ќе даде 1,0192 од своите акции за секоја акција на „Дискавер“ , што претставува премија од 26,6 отсто во однос на нејзината цена на затворање на 16 февруари, соопшти компанијата со седиште во Меклин, Вирџинија. Трансакцијата, првпат објавена од „Блумберг“, се очекува да биде затворена кон крајот на 2024 или почетокот на 2025 година, кога треба да завршат сите регулаторни и акционерски одобренија за двете компании.
Купувањето на „Дискавер“ во моментов е најголемото спојување годинава, а досега таа титула ја држеше аквизицијата на „Синопсис“ (Synopsis Inc.) од околу 34 милијарди долари, кога ја купи ИТ-компанијата „Ансис“ (Ansys Inc). Според податоците собрани од „Блумберг“, компанијата ќе ги надмине ривалите како што се „ЏП Морган“ (JPMorgan Chase & Co.) и „Ситигруп“ (Citigroup Inc.) во однос на обемот на заемот по спојувањето. Ова спојување ќе му даде шанса и на „Капитал уан“ да биде поприсутен во светот на платните мрежи.
Акциите на „Дискавер“ поскапеа дури за 18 отсто во претпазарното тргување во вторникот. Акциите на „Капитал уан“ паднаа за околу 3,4 отсто.
Акционерите на „Капитал уан“ ќе поседуваат околу 60 отсто од новата компанија, а акционерите на „Дискавер“ ќе ги поседуваат преостанатите, се наведува во соопштението. Оваа аквизиција ќе генерира синергија пред оданочување од 2,7 милијарди долари.
„Главната причина се фиксните трошоци на технологијата, поради што велат дека поголемите компании се подобри компании“, вели Џеј Ритер, професор по финансии на Универзитетот во Флорида. „Овој факт преобликува многу индустрии со текот на годините и не гледам причина да мислам дека трендот ќе се промени“.
„Капитал уан“ претходно мораше да се потпира на „Виза“ (Visa Inc) или „Мастеркард“ (Mastercard Inc.) за издавање кредитни картички. По купувањето на „Дискавер“, компанијата би можела да ги исклучи двајцата посредници и да има поголема контрола врз цените што трговците ги наплаќаат секојпат кога потрошувачот ќе ја повлече својата картичка при наплатата.
