Европската комисија го одобри барањето на Хрватска за доделување 25 милиони евра државна помош за поддршка на проширувањето на терминалот за течен природен гас (ЛНГ) на хрватскиот остров Крк.
Хрватска до сезоната 2025/2026 година има намера да ги заврши работите за проширување на капацитетот на терминалот за ЛНГ со цел да достигне 6,1 милијарди кубни метри гас годишно од сегашните 2,9 милијарди.
Со проектот се предвидува на постојниот терминал за ЛНГ на Крк да биде инсталиран дополнителен модул за регасификација, со капацитет од 250.000 кубни метри на час. Помошта ќе биде во форма на директен грант, со што ќе се покрие дел од инвестициските трошоци на операторот на терминалот „ЛНГ Хрватска“.
Целата инвестиција се проценува на 40 милиони евра.
„Комисијата ја оцени мерката во согласност со правилата на ЕУ за државна помош, кои им овозможуваат на земјите членки да го поддржат развојот на одредени економски активности под одредени услови. Комисијата утврди дека мерката е неопходна и соодветна со цел да му се овозможи на корисникот да го спроведе проектот, а исто така смета и дека проектот е потребен за да се обезбеди снабдување со гас за Хрватска и регионот на Југоисточна Европа и истовремено да придонесе за диверзификација на снабдувањето со енергија и ставање крај на зависноста од руските фосилни горива во согласност со планот на ЕУ“, се наведува во соопштението на Европската комисија.
Според Комисијата, помошта е неопходна за да може да се реализира проектот, кој ќе овозможи постабилно снабдување со гас на Хрватска и регионот на Југоисточна Европа, ќе ја поттикне диверзификацијата во снабдувањето со енергија и ќе ѝ стави крај на зависноста од руските фосилни горива.
.webp){kind=icon}
